O paro rexistrado aumentou na Galiza en 1.597 persoas no mes de xaneiro, segundo os datos que esta sexta feira vén de publicar o Ministerio de Traballo. Isto supón un incremento de media de 51 novas persoas no paro cada día.
Na Galiza hai rexistradas 131.101 persoas no desemprego, a maioría delas no sector servizos (máis de 93.000), seguida de Industria (perto de 13.000). O colectivo sen emprego anterior ten rexistradas no paro ao redor de 11.000 inscritas, mentres que no sector primario hai 4.300.
Por provincias, foi A Coruña onde máis creceu o paro, con 696 desempregados máis en xaneiro, 1,34% máis. Con todo, no último ano reduciu as súas cifras en 5.733 persoas, até 52.563 parados,9,83% menos.
En Lugo hai na actualidade 12.820 persoas sen emprego, 435 máis que hai un mes (+3,51%). Situación similar viviu Ourense, con 15.387 parados, un 367 máis que en decembro (+2,44%). Por último, na provincia de Pontevedra hai na actualidade 50.331 desempregados, 99 máis que en decembro (+0,2%).
Do total de parados galegos, 57,9% é muller e un 3,96% ten menos de 25 anos.
Por sectores, todos diminuíron o número de parados agás os servizos, que aumentaron en 2.006 persoas, até 93.681 desempregados en xaneiro. Mentres tanto, a agricultura pechou o mes con 4.321 parados (-65); a industria con 12.909 (-171); a construción con 8.907 (-51) e 11.283 desempregados non tiveran un traballo antes (-122).
Entre outros datos, o total de beneficiarios de prestacións por desemprego na Galiza en xaneiro foi de 86.925 persoas, das cales 42.432 cobraba unha prestación contributiva e 40.166 un subsidio. Ademais, 4.327 cidadáns percibían unha renda activa de inserción. De media, aqueles que reciben unha prestación contributiva cobran na Galiza 941,8 euros, por baixo da media estatal (990,5 euros).
A nivel estatal, o número de parados rexistrados nas oficinas dos servizos públicos de emprego subiu en 60.404 persoas en xaneiro en relación ao mes anterior tras o fin da campaña de Nadal, o que supón un aumento do 2,2% en termos porcentuais, sempre segundo os datos do Ministerio.
