En novembro, 68% da contratación foi temporal

O paro rexistrado en novembro nas oficinas dos servizos públicos de emprego baixou na Galiza en 2.180 persoas en relación ao mes anterior (-1,63%) até quedar en 131.168 persoas desempregadas, segundo os datos que publicou esta segunda feira o Ministerio de Traballo e Economía Social a través do Servizo Público de Emprego Estatal (SEPE). O paro baixa en 2.180 persoas en novembro na Galiza En relación aos contratos rexistrados, o mes pasado houbo 57.224, nos que 39.053 foron contratos temporais (68.25%) e o resto, 18.171 (31,75%), indefinidos. No acumulado interanual, con 675.662 contratos, a repartición é de 222.128 indefinidos (32,88%) e 453.534 temporais (67,12% restante). Novembro tamén rematou coa perda de 4.287 cotizantes á Seguridade Social, en relación co mes anterior, o que supón unha caída de 0,4%, seis veces superior á da media estatal. En relación ao desemprego por sexos e idade, de 131.168 persoas desempregadas rexistradas o mes pasado, 76.471 foron mulleres, 1.828 menos (-2,33%) e 54.697, homes, o que supón un descenso de 352 respecto ao mes anterior (-0,64%). En novembro, o paro entre as mozas e os mozos menores de 25 anos baixou, con 357 persoas paradas menos que ao feche do pasado mes (-6,15%), mentres que o paro das persoas con 25 anos e máis se incrementou en 1.823 (+1,43%). Por sectores, na Galiza o descenso correspóndese fundamentalmente co sector servizos (-1.621), seguido da industria (-303) e o colectivo sen emprego anterior (-386). Aumentou en 75 persoas o paro na agricultura e en 55 na construción. Estes van ser os cambios e as novidades no subsidio do paro Precariedade, para a CIG En opinión do secretario xeral de negociación colectiva da CIG, Francisco Sío, estes datos indican que a actual lexislación laboral "está baseada nun modelo de precarización e de inestabilidade na contratación por moito que o Goberno español diga que hai máis contratación indefinida”. A central nacionalista, en relación aos contratos indefinidos, denuncia que “é habitual o contrato fixo descontinuo, tamén os contratos a tempo parcial sen un salario completo e, por último, os despedimentos por non cumprir o período de probas e sen indemnización”. Outra nota negativa que salienta Sío é que “as mulleres, ademais de seguir sufrindo a parcialidade, son as que sofren máis o paro”. Neste sentido, lembra que a precariedade concéntrase “nun sector moi feminizado como é o de servizos, cun 70% de desemprego e moi feble”. Neste sentido, a CIG sinala o efecto dunha maior contratación nos servizos e observa un descenso importante da afiliación á Seguridade Social “malia que estas datas son favorábeis á contratación”, conclúe Sío. Tendencia negativa, para CCOO Desde CCOO amosan a súa preocupación pola caída na afiliación á Seguridade Social. A secretaria de emprego deste sindicato, Maica Bouza, apunta que a Galiza “leva xa un par de meses cunha tendencia distinta á do conxunto do Estado español" e lamenta que o Goberno galego, “cando non está traballando para Núñez Feixoo, está preocupado preparando as eleccións autonómicas”. Para esta sindicalista, “os datos do paro serían bos se fosen acompañados dun incremento afiliativo”. Neste contexto, o descenso na afiliación á Seguridade Social indica un “abandono do mercado de traballo galego por falta de expectativas laborais”, subliña Bouza. UXT pide reforzar as oficinas de emprego Para a UXT, os datos da contratación indefinida de novembro son “unha proba de que a reforma laboral de 2021 continúa mantendo o seu potencial transformador case dous anos despois da súa entrada en vigor”. Neste sentido, o sindicato considera que “o seu impacto sobre a temporalidade non era só produto das puntuais adaptacións das empresas á nova normativa laboral, senón que efectivamente está a conseguir asentar a taxa en valores máis baixos aos tradicionalmente rexistrados”. O paro aumenta en 2.705 persoas no mes de outubro na Galiza Porén, o secretario de Organización de UXT na Galiza, José Fernández Celis, entende que “hai que reforzar os servizos públicos de emprego”. Neste sentido, apunta a que “é preciso acelerar a revisión da taxa de cobertura, para que recolla adecuadamente os cambios producidos no mercado laboral tras a reforma, e en especial tras o aumento da contratación fixa descontinua”. Este sindicalista entende que “coñecer a cobertura real do sistema de protección por desemprego é o primeiro paso antes de abordar calquera reforma de maior calado no mesmo, tal e como se está propondo para a súa dimensión asistencial”. Neste aspecto, UXT exixe que a reforma, neste ámbito, sexa "no diálogo social". “Novembro negro” para o traballo autónomo A Unión de Profesionais e Traballadores Autónomos (UPTA) lamentou que nos datos que se deron a coñecer onte vese un "novembro negro" para o pequeno comercio e a hostalaría, tras o feche de 5.500 negocios o mes pasado no conxunto do Estado. Neste sentido, oito territorios presentan saldos negativos, coas Illes Balears á cabeza, con 3.500 efectivos menos. Tamén perden afiliados a Galiza (-431) e Castela-A Mancha (-375), entre outros." O Goberno galego, pola súa parte, parabenizouse de que os datos "confirmen a tendencia favorábel dos tres últimos anos na comparativa mensual".