O colectivo de traballadores de Repsol xuntáronse ás portas da factoría a primeira hora da mañá en asemblea aberta para decidir os pasos a dar tras o accidente laboral do pasado sábado no que dous compañeiros resultaron feridos.
Un dos operarios, Unai Martínez, faleceu onte ao non superar as lesións producidas polo escape de gas que a petroleiras e as autoridades xudiciais están a investigar.
Os traballadores das empresas auxiliares acordaron parar. Hoxe non entraron traballar. Exixen que se esclareza o accidente que lle custou a vida a Unai Martínez, "depurar responsabilidades e que a petroleira atenda as reivindicacións do colectivo de traballadores e traballadoras das contratas", sinalaron representantes da CIG.
O seu secretario xeral, Paulo Carril, lembrou que onte á tarde creouse unha comisión, formada por representantes e ligazóns sindicais, que exixiu á dirección da petroleira que os recibise "de inmediato". "Repsol non nos dá cita até o próximo 5 de abril", indicou Carril, quen asegura que as reivindicacións que teñen "non poden esperar máis tempo".
Piquetes e nova asemblea
Operarios das empresas auxiliares elaboraron unha "táboa reivindicativa" na que inclúen maior experiencia e seguridade nos seus postos de traballo. "Menos urxencia na produción e máis présas na prevención", reclamaron onte moitos deles.
Os traballadores das empresas subcontratas de Repsol organizaron piquetes ante a refinería, o porto exterior e en Nostián, para tratar de impedir o paso de operarios e recursos das auxiliares cara a refinaría.
A partir das 18 horas, está prevista unha nova asemblea para valorar outras accións, sen descartar a folga, a sabendas de que "ás 20 horas Repsol da por acabado o duelo".
"Imos continuar en paro", engadiu. "A xente non vai incorporarse a traballar ata que non haxa unha solución a estas reivindicacións e unha interlocución con Repsol", insistiu o secretario xeral da CIG.
Solidariedade
Traballadores e traballadoras dos estaleiros de Fene e Ferrol tamén se concentraron esta mañá en sinal de repulsa e so sinistro accidente mortal en Repsol e en solidariedade coa familia, amigos e compañeiros de Unai Martínez.
