Os datos do Instituto Galego de Estatística (IGE) sobre as afiliacións á Seguridade Social amosan resultados interesantes e que axudan a interpretar mellor a realidade dunha Galiza máis heteroxénea do que moitos presupoñen. Cales son as comarcas que teñen unha maior porcentaxe de afiliacións á Seguridade Social de nacionalidade estranxeira? Podíase pensar que as grandes cidades, ou quer a franxa atlántica, que se liga co maior desenvolvemento económico. Porén, ningunha das cinco comarcas con máis porcentaxe de persoas de nacionalidade estranxeira inscritas na Seguridade Social se atopa nesas áreas. A media en Galiza é dun 2,9%, é dicir, que de cada 100 afiliados á SS tres son estranxeiros. Unha porcentaxe que sobe ao 7% en Viana, ao 6,6% na Mariña Central, as tres comarcas que lideran o ranking, seguidas de Valdeorras (6,2%) e A Mariña Occidental, cun 5,5%.
Se a pregunta se refire á maior porcentaxe de afiliados nun sector como a construción a resposta é que o Concello con máis asalariados, porcentualmente, neste ramo de actividade é Gomesende, un pequeno municipio de pouco máis de 800 habitantes na Terra de Celanova, un 21,5%. Un de cada catro traballadores. Séguenlle Cabana de Bergantiños, cun 21% e Pontedeva, cun 20%. En Cerdedo 19 de cada 100 afiliados á SS figuran na construción, e en Xunqueira de Ambiá son o 18,4%.
A Illa de Arousa, unha illa entre tanta terra adentro
O sector primario é un alicerce en emprego no noso país, onde representa a principal fonte de traballo en non poucos concellos. Na lista dos 15 municipios galegos con máis porcentaxe de afiliados ao sector primario, 14 son do interior. Mais o que encabeza o ránking é da costa, A Illa de Arousa, onde o 49,5% dos seus afiliados á S.S figuran neste sector, case un de cada dous. Un peso que proporciona o mar (sectores mexilloeiro e marisqueiro principalmente).
A continuación figuran Dozón, cun 47,4% e Rodeiro, 45%, dous concellos do interior de Pontevedra e onde agro e gandeiría teñen un peso e importancia sonsiderábel. Séguenlle A Pastoriza, cun 44,8% de afiliacións, e Pol, cun 44,1%.
En sector servizos atopamos a cidades e vilas grandes liderando a táboa de porcentaxe de afiliacións a este sector. Mais entre ellas cóase en segundo lugar Mondariz-Balneario, cun 86% de afiliacións á Seguridade Social en servizos. A lista lidéraa Compostela (86,8%) e nos cinco primeiros postos figuran A Coruña, cun 85,8%, Ames, cun 83,8% e Oleiros, cun 83,4%.
