Axentes da Garda Civil detiveron un total de catro persoas e investigan outras tres en relación cun delito de trata de seres humanos con fins de explotación laboral na comarca do Deza.
A investigación, bautizada como ‘Operación Pitangus’, levou a cabo por parte do Equipo de Policia Xudicial da Garda Civil de Lalín e por efectivos do Grupo de Información da Comandancia de Pontevedra. Ademais das detencións, levouse a cabo un rexistro nun inmóbel de Lalín, e non se descartan novos arrestos.
As pescudas iniciáronse en agosto do ano pasado, cando un cidadán búlgaro interpuxo unha denuncia. Segundo relataba, un empresario da comarca do Deza, dedicado á limpeza de granxas porcinas e avícolas, empregaba cidadáns estranxeiros en situación laboral e en condicións que vulneraban os seus dereitos.
Os axentes realizaron varias inspeccións e constataron a existencia de traballadores estranxeiros, sen contrato e en situación irregular en varias granxas. Moitos deses traballadores chegaran a Lalín por mediación dese empresario, que os atraía con ofertas suculentas de emprego.
Cando chegaban, o empresario prometíalles que se traballaban para el facilitaríalles documentación para legalizar a súa situación e daríalles de alta na Seguridade Social. Con todo, cando xa estaban a desempeñar as tarefas, non cumpriu as súas promesas, alegando que lles facía "un favor" dándolles traballo e lembráballes a súa situación irregular.
Nas últimas horas a Garda Civil fixeron un rexistro no domicilio do xefe da trama, onde se localizaron 50.000 euros en efectivos e diversa documentación.
Condicións “abusivas”
As vítimas atopábanse en condicións laborais abusivas, traballaban de luns a domingo máis de 12 horas diarias, sen descanso; non dispoñían de vacacións nin das condicións mínimas de saúde laboral; e non contaban con elementos de seguridade e protección para facer o seu traballo, e iso a pesar de utilizar produtos desinfectantes e corrosivos.
A organización dispoñía de varios pisos en Lalín, onde tiñan aloxados aos traballadores para telos controlados en todo momento. Trátase de persoas en situación de necesidade e vulnerabilidade económica.
Ante estes feitos, a Garda Civil activou o Protocolo de Protección de Vítimas de Explotación e informouse aos prexudicados dos seus dereitos, entre eles, ser derivados a recursos asistenciais e de aloxamento.
Comparecencia no xulgado
Un dos detidos nesta investigación foi posto en liberdade esta quinta feira en sede policial, tras tomarlle declaración, mentres que os outros 3 arrestados pasaron esta sexta feira ao dispor do xulgado de instrución número 2 de Lalín.
Os tres están investigados xudicialmente por suposto delito de trata de seres humanos, delito contra os dereitos dos traballadores, coaccións e favorecemento da inmigración ilegal.
