A Xunta da Galiza ten previsto realizar esta quinta e sexta feira, días 22 e 23 de xuño, unha activación de proba das sirenas de aviso á poboación adscritas ás 39 presas galegas que están dotadas de plan de emerxencia.
Segundo informa a Administración galega, trátase dun simulacro sonoro que acenderá máis dun cento de alarmas situadas por todo o país coa colaboración dos titulares das infraestruturas, é dicir, Alcoa, Emalcsa, Endesa, Iberdrola, PHG, Naturgy, Xeal e Augas da Galiza.
Tamén participará persoal dependente da Vicepresidencia Segunda e Consellaría de Medio Ambiente, Territorio e Vivenda da Xunta da Galiza, así como integrantes de Protección Civil dos concellos afectados e persoal da Confederación Hidrográfica Miño-Sil.
Ademais dos encoros, activaranse as catro sirenas adscritas ao plan de emerxencia exterior da balsa de lodos vermellos, situada en Xove (Comarca da Mariña).
Segundo detalla a Xunta, o primeiro sinal de aviso audíbel será a partir das 9 horas desta quinta feira augas abaixo da presa de Belesar, nos concellos de Chantada, O Saviñao, Carballedo e Pantón, entre as comarcas de Chantada e Terra de Lemos.
A partir desa hora, as probas desenvolveranse en diversas localidades do país até as 13 horas. Finalizará no encoro de Albarellos, en Boborás, O Carballiño, Leiro, Beade e Cenlle, entre as comarcas do Carballiño e O Ribeiro.
Ao día seguinte, esta sexta feira, retomaranse as probas ás 9 horas da mañá na presa de Vilagaduin, en Tordoia (Ordes), e concluirán ás 13 horas na da parroquia Velle, en Ourense.
A Xunta afirma que os simulacros "non afectarán á actividade diaria" da veciñanza pero que, en calquera caso, a poboación será informada dos mesmos e das medidas de autoprotección previstas en caso de emerxencia real.
