Os socorristas advirten que o principal problema dos rescates nos areais galegos débese a que os visitantes "non fan caso" ás súas recomendacións.
Á chegada da época estival, un dos temas que saen á palestra na Galiza é a cobertura de prazas destes profesionais nas praias e é que, desde hai uns anos, este colectivo experimenta un "déficit importante". Así o explica a presidenta da Federación de Salvamento e Socorrismo da Galiza, Nuria Rodríguez.
Desta forma, hai praias nas cales o pasado ano contaban con servizo de socorrista e este ano "non hai". Noutras, estes profesionais non chegan para cubrir os areais da localidade e os concellos deben decidir en cal manter o servizo e nos que deixalo fechado.
En canto aos rescates, Rodríguez apunta a varios factores. En primeiro lugar, situou o obxectivo principal do traballo deste colectivo, que é a prevención de accidentes. "Se non hai persoal suficiente é cando se producen", lamenta.
Con todo, tamén remarca o descoñecemento da contorna por parte dos turistas, así como "unha falta de conciencia" por parte da xente ante o traballo dos socorristas.
"Non fan caso das recomendacións, métense igual con bandeira vermella á auga, tíranse das pedras. Todo iso, a pesar de que os socorristas lles din que non", remarca Rodríguez.
Prevención, en palabras de Rodríguez, é o traballo dos profesionais deste ámbito. Así, sinala que se se produce un rescate é porque, entre aspas, se fai " un mal traballo".
"Buscamos unha prevención para que non haxa accidentes e non haxa rescates. Se a xente non fai caso ao final prodúcense e nós non temos autoridade para multar, nin nada polo estilo", argumenta a presidenta Federación de Salvamento e Socorrismo da Galiza.
"Falta de civismo"
O concello de Valdoviño (Ferrolterra) fechou o mes de xullo con máis dunha decena de rescates. O alcalde do municipio, Alberto González, advirte dunha "falta de respecto" por parte dos bañistas que "non fan caso ás sinalizacións".
"Moitos destes rescates veñen derivados por meterse con bandeira vermella", lamenta González, á vez que explica que, nos areais deste municipio teñen "problemas de prazas" e hai praias que quedaron sen socorristas dos que "habitualmente se cobren".
Así, puntualiza que un socorrista "non ten porque pór a súa vida en perigo" xa que "non ten" porque meterse nunha praia de bandeira vermella. Este comportamento nótano "moito máis este ano" que os anteriores.
"As bandeiras son universais e a megafonía está en varios idiomas. O que creo que hai é unha falta de civismo e hai un exceso de reclamación de dereitos esquecendo que tamén hai deberes", lamenta o alcalde.
Ante esa falta de prazas asevera que "hai moitísimos concellos" que non as cubriron e incidiu que este problema "increméntase" nos ámbitos xeográficos nos que hai "un maior despoboamento".
Isto débese, en palabras de González, a que socialmente "hai menos xente nova" que é a que "potencialmente" se pode dedicar a esta profesión nos meses de verán.
Finalmente, fai referencia ao rexistro galego dos socorristas que aínda que estean apuntados "non ten que ver" con que sexan profesionais en activo.
