O Tribunal Superior de Xustiza da Galiza (TSXG) afirmou, nun procedemento do 16 de novembro ao que tivo acceso Nós Diario en exclusiva, que "vista a evidente posición de poder de Monbus nalgunhas das UTE [Unións Temporais de Empresas] adxudicatarias", entende que "desde unha perspectiva global está probado que tal grupo concorreu aos diferentes lotes coa finalidade de adulterar o procedemento de licitación no seu proveito e que esta finalidade está proscrita polo ordenamento xurídico".
Así, lembrou que esta fora "a razón de estimar a demanda" na sentenza de 20 de Octubre de 2023, tamén adiantada por este xornal, empregada como exemplo neste procedemento. Nesta anulaba a concesión ao grupo Monbus por parte da Xunta da Galiza da liña de transporte escolar correspondente co concello de Cambados, na comarca do Salnés. Ante esta sentenza, as partes demandadas solicitaron rectificación de erros e complemento da sentenza, algo que denegou o Alto Tribunal.
Dita sentenza, que tamén fora adiantada por este xornal, sinalaba “que, tal e como destaca a empresa recorrente nas súas conclusións, das probas realizadas se desprende que os pregos contemplan a limitación de adxudicación dos lotes e que os demandados non respectaron”.
Ademais, o auto lembraba que as bases do concurso estabelecían que “cada licitador poderá ser adxudicatario dun ou varios lotes, cun límite máximo de oito lotes”, mentres a Monbus se lle adxudicaron 39 lotes.
Agora, o TSXG estabelece que "non hai lugar á solicitude de rectificación de erros e complemento de sentenza solicitada polo Letrado da Xunta, así como á solicitude de complemento presentada pola Procuradora da parte codemandada", polo que se lle impón "as costas ás devanditas partes", que deberán pagar 300 euros cada unha. Ademais, o tribunal declara que "non cabe recurso ningún contra a presente resolución", dando firmeza á sentenza contra a adxudicación.