Os 13,94 metros captados na boia de Portos do Estado en Estaca de Bares, no municipio de Mañón (Ortegal), foi o récord estatal absoluto de altura de onda significante -media das máis altas durante un período dunha hora- desde que existen rexistros.
Así, a onda de 13,94 metros rexistrada ás 22 horas do sábado supera a de 13,72 metros da boia de Bilbo (Euskadi) durante o paso do ciclón extratropical Klaus en 2009, segundo trasladou nun comunicado Portos do Estado.
O paso das borrascas Celine, Ciáran e Domingos, que mantiveron en alerta vermella todo o litoral galego desde mediados da pasada semana até o domingo, fixo que as boias operativas de Portos do Estado obtivesen rexistros medios elevados mais sen alcanzar niveis de récord.
Segundo explica o organismo, a altura de onda significante representa o valor medio do terzo de ondas máis altas rexistradas durante un período dunha media hora. Trátase dun parámetro estatístico de "grande utilidade" para describir a intensidade da ondada na posición da boia e é máis definitorio, por tanto, da dureza do temporal.
Con todo, a boia de Estaca de Bares non ten a tecnoloxía para transmitir en tempo real a altura de onda máxima, polo que será necesario descargar os datos de abordo para coñecer os rexistros captados durante o temporal.
Portos do Estado si dispón desta información na boia de Cabo Silleiro, no municipio de Baiona (Vigo), que marcou 16,47 metros o 5 de novembro ás 4 horas, e na de Langosteira (A Coruña), que rexistrou 15,89 metros o 4 de novembro ás 19 horas; valores que destaca como "moi elevados" mais que non supuxeron récords.
Outubro húmido e extremadamente cálido
Por outra parte, Meteogalicia fixo esta terza feira balance da meteoroloxía vivida o pasado mes de outubro, que foi extremadamente cálido na Galiza e moi húmido con dúas metades ben diferenciadas: unha primeira con temperaturas moi superiores ao habitual e unha segunda en que as precipitacións foron abundantes para a época.
Até o día 12, as altas presións no norte da península Ibérica achegaron aire cálido procedente da África setentrional e trouxeron unha estabilidade que se rompeu o día 13, xornada na que se produciu un cambio brusco coa entrada da primeira borrasca que, con todo, non compensou a calor das dúas primeiras semanas.
Desde o día 15 e até final de mes sucedéronse as borrascas, entre elas Babet, Aline, Celine e, en menor medida, Bernard; que apenas tivo incidencia na Galiza. Por zonas, os valores de temperatura máis elevados recolléronse nas ribeiras do Sil e do Miño, cuxa temperatura máxima oscilou, de media, os 22,9 e 23,7 graos. Pola contra, os máis baixos, comprendidos entre 15,3 e 17,5 graos, rexistráronse nas zonas máis elevadas do país, como son as serras do Courel, de Queixa ou de Eixe.
A pesar de que os primeiros 12 días foron secos, as borrascas consecutivas até final de mes fixeron que a precipitación media acumulada alcanzase 389 litros por metro cadrado, dándose os valores máis altos na vertente atlántica, onde o máximo absoluto foi superior aos 1000 litros por metro cadrado.