Milleiros de persoas mobilizáronse este domingo en varias cidades na Galiza en solidariedade co pobo palestino e contra os incesantes bombardeos e o asedio que Israel está a realizar sobre a Faixa de Gaza.
Breaking: Israeli air strikes bomb Arafat tower in Nasser neighborhood in #Gaza,without any warning . pic.twitter.com/2R8nSkNLSO
— Nour Naim| نور نعيم (@NourNaim88) October 22, 2023
"Ante os acontecementos que se están producindo en Palestina", a Asociación Galaico Árabe Jenin, BDS Galiza, Mar de Lumes e Galiza por Palestina convocaron concentracións e manifestacións o domingo ás 12 horas nas cidades da Coruña, Betanzos, Burela, Allariz, Cangas, Carballo, Cee, Pontedeume, Compostela, Ferrol, Lugo, Monforte, Ourense, Pontevedra, Ribeira, Vigo e Vilagarcía.
"A sociedade galega asiste con alarma e indignación aos crimes contra a humanidade en Gaza mentres aumentan a ocupación e os ataques á poboación en Cisxordania. O pobo palestino debe ser libre para decidir o seu destino sen máis inxerencias colonialistas", aseguraron. Ademais, exixiron unha solución política que acabe con estes ataques e "non se conforme coa apertura da entrada de axuda humanitaria".
BDS Galiza repartiu panfletos nos que instou a premer Israel para que "respecte" o dereito internacional, deixando de "ocupar e colonizar" todas as terras palestinas, que recoñeza o dereito fundamental á plena igualdade dos cidadáns árabe-palestinos de Israel e o do dereito de retorno das persoas refuxiadas aos seus fogares e propiedades.
Na capital galega, a choiva non foi quen de parar a solidariedade, e unha multitude de persoas (e de paraugas) ateigou a compostelá praza das Praterías. Un dos asistentes, palestino que reside na Galiza, lamentou que "non queda máis remedio" que saír á rúa para "denunciar un xenocidio" que se executa contra Gaza.
Compostela mobilízase en solidariedade co pobo de #Palestina. "Non é unha guerra, é un xenocidio", denuncian. Claman por unha Palestina libre e acusan a UE de apoiar o Estadao terrorista de Israel #PalestinaVencerá pic.twitter.com/Rw6Jr8vaer
— CIG (@galizaCIG) October 22, 2023![Publicidade 196351]()
"Temos que levantar a voz e dicir que: xa abonda! O cheque en branco que deu o Goberno de España e outros occidentais encabezados polos EUA non significa que executen a todo un pobo", criticou. A continuación, incidiu en que alguén que teña conciencia "non pode durmir tranquilo" ante o que ocorre en Gaza. "Se esta executando unha limpeza étnica, mandan á xente do norte ao sur e logo bombardéanos e agora utilizan a propaganda para meter máis medo", lamentou.
En Vigo, unha multitudinaria manifestación percorreu o centro da cidade olívica até chegar á rúa do Principe, na que se coreou, entre outras consignas: O pobo galego, co pobo palestino.
Unha multitudinaria manifestación percorreu as rúas de Vigo en solidariedade co pobo palestino. pic.twitter.com/fS3KFOyj3e
— Nós Diario (@NosDiario) October 22, 2023
Tamén foron numerosas as persoas que se concentraron na Coruña ao redor do Obelisco, onde unha multitude formou un circulo no medio do cal se realizou a lectura dun manifesto en apoio do pobo palestino.
Mesmo sistema que se empregou na cidade das Burgas, onde o lugar escollido para as protestas foi a Delegación estatal de Defensa en Ourense, na que as persoas que se manifestaron berraron: Estado español, cómplice da ocupación.
🇵🇸#Ourense mobilizouse este domingo en solidariedade coa #Palestina diante da delegación española de Defensa.
— CIG (@galizaCIG) October 22, 2023
👉"Estado español, cómplice da ocupación", berraron as asistentes, entre outras consignas.#GalizaConPalestina pic.twitter.com/kKcvsQLpVo
En Lugo, máis dun centenar de persoas participaron no acto, que tivo lugar diante do Concello da cidade das murallas, e no que as manifestantes que portaron pancartas con lemas como Paremos o xenocidio ou Palestina libre.
Representación institucional
Na manifestación da capital galega participou a portavoz nacional do BNG, Ana Pontón, a voceira de Podemos, Isa Serra, o deputado do BNG no Congreso, Néstor Rego, a alcaldesa de Santiago, Goretti Sanmartín, e o representante de Anova, Martiño Noriega, entre outros. O Bloque apoiou todas as concentracións que tiveron lugar este domingo no país, mentres que nalgunhas outras tamén acudiron representantes de outras forzas, como é o caso de Marea Atlántica na Coruña ou de Compostela Aberta en Santiago.
Pontón incidiu desde Compostela en que o que sucede en Palestina é un "auténtico xenocidio" e que "non se pode permitir" que iso se realice "coa complicidade" do Estado español nin das institucións da Unión Europea (UE).
Pola súa parte, Serra, tamén desde a capital galega, denunciou que "hai medio millón de persoas que foron desprazadas, segue o bloqueo, seguen os cortes de subministracións e hai máis de 4.000 persoas que foron asasinadas, das cales case a metade son crianzas".
"Regresamos ás rúas para exixir a fin da violencia e para reclamar unha Palestina libre", sinalaron desde Compostela Aberta. "Nada xustifica os ataques sistemáticos contra a poboación civil e a negación de auxilio. Nada xustifica o que Israel está a facer en Gaza", afirmaron desde a Marea Atlántica.
