Dous dos detidos polo crime de Samuel Luiz que eran menores de idade cando se produciron os feitos, en xullo do ano pasado, foron condenados a tres anos e medio por asasinato, a cumprir nun centro de menores, tras un acordo de conformidade entre as partes persoadas nesta causa.
Así o notificou esta cuarta feira o Tribunal Superior de Xustiza da Galiza (TSXG), logo de que na terza confirmase que a principios deste mes xa se lles condenara tras un acordo de conformidade entre as partes, e que se atopaban cumprindo a condena nun centro de internamento en réxime fechado.
Desde o alto tribunal galego ratificaron que non se atopaban en liberdade, posibilidade que existía despois de que se alcanzase o prazo máximo de nove meses de internamento que podían estar nun centro de menores desde a súa detención se non había xuízo ou se chegaba a un acordo, como foi finalmente o caso.
Agora cumpren a condena en réxime fechado nun centro de menores, ao que se suma a medida de liberdade vixiada durante tres anos, "a cumprir unha vez saian do centro", precisan desde o TSXG, en relación a unha causa que se está a resolver nun xulgado de menores.
Tras o crime de Samuel Luiz foron detidas sete persoas: cinco adultos, entre eles unha muller, e os dous mozos que eran menores no momento dos feitos.
Para estes decretouse o seu ingreso nun centro de menores e para os tres adultos o ingreso en prisión. No caso dos outros dous, entre eles a muller, atópanse en liberdade, aínda que investigados, por estes feitos.
Pola morte do mozo, tras unha brutal malleira á saída dun local na avenida de Bos Aires da Coruña, na madrugada do 3 de xullo, Fiscalía e acusacións piden un delito de asasinato para os investigados. Polo de agora estase á espera de que se fixe a data dun xuízo que algunhas fontes consultadas por Europa Press non sitúan antes do verán.
