A Audiencia da Coruña estimou o recurso de apelación presentado pola defensa do último detido polo asasinato de Samuel Luiz, A. M. R., e decidiu deixalo en liberdade ao entender que “non existen motivos” neste momento procesual para manter a prisión provisional.
O tribunal impúxolle ao arrestado, que segue como investigado na causa, a obrigación de comparecer cada semana e cantas veces fose chamado perante o xulgado que tramita a causa, así como a prohibición de abandonar o territorio estatal.
Con esta detención, pola morte de Samuel Luiz foron sete os arrestados, cinco adultos e dous menores
Neste sentido, acordou a retención do seu pasaporte ou, no caso de que non dispoña dese documento, a prohibición de que se lle expida, de acordo coa decisión adoptada.
A Sección Primeira da Audiencia Provincial adiantou esta terza feira o fallo ás partes, o que supón a inmediata posta en liberdade do investigado.
Con esta detención, pola morte de Samuel Luiz, na madrugada de 3 de xullo á saída dun local de lecer nocturno na Coruña e cando estaba a realizar unha videochamada cunha amiga, son sete os arrestados, cinco adultos e dous menores.
Dos primeiros, tres seguen en prisión, mentres que á única moza, en liberdade con cargos e con comparecencias nos xulgados, súmase agora A. M. R. tras a decisión adoptada sobre a súa posta en liberdade.
