Despois de semanas de murmurios e predicións, presidente do Goberno español, Pedro Sánchez, anunciou na mañá da sexta feira que as máscaras deixarán de ser obrigatorias nos espazos ao aire libre a partir do sábado 26 de xuño.
Na súa intervención na clausura da Reunión Círculo de Economía, que decorre en Barcelona, o xefe do Executivo estatal explicou que convocará un Consello de Ministros extraordinario a próxima quinta feira para aprobar a medida.
Sanidade e Moncloa queren evitar agora un novo parche. O feito de que convocase un consello extraordinario e non aproveite o ordinario das terzas ten o seu motivo, segundo explicaron responsábeis do Ministerio de Sanidade.
O Executivo quere discutir os detalles da nova normativa sobre máscaras coas autonomías, tanto na terza feira na Comisión de Saúde Pública como a cuarta no Consello Interterritorial de Saúde. Explicou Sánchez que a máscara en exteriores seguirá a ser obrigatoria sempre e cando non se respecte o metro e medio de distancia entre as persoas.
Última fin de semana con máscaras ao aire libre
"Este será a última fin de semana con máscaras nos espazos ao aire libre", celebrou Sánchez, que destacou que as previsións que fixo o Goberno non só son optimistas senón que van ficar curtas.
O Consello Interterritorial de Saúde, integrado polo Ministerio de Sanidade e as consellerías, xa pospuxo na cuarta feira a medida. O mesmo ocorreu na terza durante a Comisión de Saúde Pública.
Varias comunidades estiveron presionando para que se adopte a medida de inmediato. Por parte da Galiza, o presidente da Xunta, Alberto Núñez Feixoo, declarara publicamente a que o obxectivo era prescindir dos cubrebocas en exteriores "en xullo ou agosto".
Francia e Alemaña apostaron polo 1 de xullo para permitir ir sen máscara pola rúa.