As listas de agarda sanitaria incrementáronse en 32.262 persoas en 2022

O Servizo Galego de Saúde vén de facer públicas as cifras das lista de agarda sanitarias referidas á segunda metade de 2022. Os datos, divulgados após dar a coñecer o Ministerio de Sanidade os números totais para esa anualidade, reflicten un importante incremento das persoas incluídas nas mesmas, rexistrando un novo máximo histórico. Así, 380.171 galegas e galegos agardan por unha cita hospitalaria, das cales 46.161 esperan una media de 77,8 días por unha cirurxía; 215.620 esperan unha media de 66 días por unha consulta hospitalaria e 118.390 esperanunha media de 88,4 días por una proba diagnóstica. Estes tres casos reflicten unha alza importante en relación cos anteriores semestre. Listas históricas As cifras facilitadas pola administración galega desmenten as achegadas polo Ministerio de Sanidade para este período. Mentres a Xunta da Galiza inclúe nas súas listas de agarda 380.171 persoas, as estatísticas estatais redúcenas a 261.718, ao deixar fóra da súa contabilidade unha parte de doentes á espera de certas probas diagnosticas. Un total de 18.155 persoas incorporáronse ás listas de agarda no último semestre de 2022 e un total 32.262 ao longo da pasada anualidade. Así, en decembro de 2021 esperaban por unha cirurxía 43.194 persoas, por unha consulta hospitalaria 193.662 e por unha proba diagnóstica 111.053. Neste sentido, as persoas en espera hospitalaria incrementáronse nos diversos niveis da Atención Especializada. Pacientes ameazan cos tribunais se non se publican os datos completos de listas de espera: "A Xunta declárase en rebeldía" Cirurxía Os tempos de espera en cirurxía son os terceiros peores de toda a serie histórica. Así, o Sergas recoñece un tempo medio de espera de 58,1 días na área sanitaria de Lugo-A Mariña-Monforte; de 65,3 na área sanitaria de Ourense-Verín-O Barco; de 61,6 na área sanitaria de Pontevedra-O Salnés; de 65,3 na área sanitaria de Ferrol; de 74,2 na área sanitaria de Vigo; de 83,9 na da Coruña-Cee e de 88,6 na de Compostela-O Barbanza. Os datos non son mellores na esfera das consultas hospitalarias. Neste sentido, o Sergas fixa un tempo medio de espera de 40,6 días na área sanitaria de Vigo; de 47,3 días na área sanitaria de Pontevedra-O Salnés; de 49 na área sanitaria de Compostela-O Barbanza; de 53,7 na área sanitaria da Coruña-Cee; de 70,8 na área sanitaria de Ferrol; de 89,2 na área sanitaria de Lugo-A Mariña-Monforte e de 102,6 na área sanitaria de Ourense-Verín-O Barco. Probas diagnósticas Os tempos de espera para unha proba diagnóstica téñense incrementado de maneira moi considerábel en 2022, seguindo unha tendencia que arranca en 2018. Por exemplo, o período medio de espera para 8.686 persoas pendentes dunha endoscopia dixestiva está en 152,3 días para toda a Galiza, chegando nalgunhas áreas sanitarias, como na de Lugo-A Mariña-Monforte, a 213 días. As probas radiolóxicas rexistran uns tempos medios de espera para o conxunto do país de 91,3 días, nove máis que no primeiro semestre de 2022. Porén, o período medio de agarda para unha ecografía de tórax é de 338 días na área sanitaria de Lugo-A Mariña-Monforte. Outro tanto acontece, nesta circunscrición sanitaria, cos estudos urolóxicos, cun tempo de espera de 380,8 días. Un de cada dez galegos está nas listas de espera sanitarias, que ascenden a 261.781 persoas Os períodos de agarda rexistran diferenzas moi notábeis en función das diferentes áreas sanitarias galegas. Así, o tempo medio de espera para un estudo urolóxico no conxunto da Galiza está fixado en 148,2 días, un prazo que se reduce a 16,2 días na área sanitaria da Coruña-Cee, que chega aos 46,5 días na área sanitaria de Compostela-O Barbanza e que se sitúa en 380,4 días na área sanitaria de Lugo-A Mariña-Monforte. O prazo requirido para realizar unha Tomografía Axial Computarizada (TAC) é outra mostra evidente do sinalado. Neste sentido, o tempo medio de espera para o conxunto da Galiza ascende a 73,3 días. Malia tratarse dunha proba común para descartar boa parte das patoloxías e de ser considerada de carácter ordinario durante anos para persoas con cancros, o período de agarda non deixa de incrementarse. Este período oscila entre os 111,5 días de espera da área sanitaria de Lugo-A Mariña-Monforte, os 75,8 días nas áreas sanitarias de Compostela-O Barbanza e da Coruña-Cee e os 34,5 días na área sanitaria de Pontevedra-O Salnés. Con todo, as listas de espera publicadas polas autoridades sanitarias recollen só unha parte dos doentes que agardan por unha cita en Atención Especializada. 37,6% da cidadanía agarda máis de seis días por unha cita en Atención Primaria Neste sentido, un dos voceiros da plataforma SOS Sanidade Pública, o médico Xosé María Dios , en conversa con Nós Diario, sinala que “os datos das listas de agarda son incompletos ao non publicarse os doentes que se acumulan nas listas non estruturais” e denuncia “o seu importante incremento nos últimos tempos”. Nese sentido, Dios apunta que “o número real de persoas en lista de agarda pode ser 50% superior ao recollido nos datos oficiais da Xunta”. Explica que “as listas non estruturais son aquelas que oficialmente non existen, están conformadas por todas as persoas que renunciaron a ser derivadas a un centro privado ou outro hospital de referencia”. A este respecto, asegura que “fan parte dun limbo legal, á espera de que a Administración os chame”. Xosé María Dios responsabiliza da existencia das listas de agarda estruturais e non estruturais a Xunta da Galiza. Nesta liña, explica que “estamos nesta situación por culpa das políticas de privatización e de desmantelamento da sanidade pública impulsadas polo Goberno galego”. Listas de agarda non estruturais As denominadas listas de agarda non estruturais incorporan un número indeterminado de persoas. A este respecto, a Valedora do Pobo, María Dolores Fernández Galiño, tense manifestado de maneira crítica no seu informe de 2020, sinalando que "os doentes -ao rexeitar seren atendidos nun centro privado- pasaban a formar parte dunha lista de espera diferente, coñecida como 'lista de espera non estrutural' na que non resultaba de aplicación o tempo de espera máximo estipulado legalmente para a realización da devandita cirurxía". A CIG-Saúde denuncia listas de espera dun ano no hospital de Monforte