Juan Carlos de Borbón quere instalar a súa corte en Sanxenxo

A actual visita de Juan Carlos de Borbón a Sanxenxo é diferente á de maio de 2022. Se naquela altura se trataba dunha viaxe puntual, cun perfil público elevado, sen unha folla de ruta definida a medio prazo e un acordo fechado entre a Casa Real e os dous principais partidos do réxime, nesta ocasión as circunstancias son distintas. Neste sentido, o círculo máis próximo ao rei emérito xa fixo saber que estadías como a desta semana repetiranse de modo continuado nos próximos meses. A contorna de Juan Carlos de Borbón filtrou a diferentes medios de comunicación a intención deste de pasar diversas tempadas os próximos meses na Galiza. A este respecto, o xornal El País sinalou que o obxectivo do emérito pasaba por estar presente en Sanxenxo durante as fins de semana de 19 a 21 de maio, de 9 a 11 de xuño e de 7 a 9 de xullo. A escolla destas datas derivaríase de que as mesmas coinciden con regatas de vela onde competiría a embarcación do pai de Felipe VI. Do “non é unha mala noticia” a “non é democrático”: Estas son as reaccións á visita do Borbón a Galiza A mudanza de perfil entre esta visita e a de maio do ano pasado non é casual. A propia Casa do Rei e o Goberno do Estado terían obrigado Juan Carlos de Borbón a limitar ao máximo a súa exposición pública e presentar esta estadía como unha decisión na esfera privada. Nesta orientación téñense manifestado representantes institucionais que coñecen de perto a estadía do emérito na Galiza, como o alcalde de Sanxenxo, Telmo Martín, pero tamén responsábeis gobernamentais, comezando polo Delegación do Goberno español no país. A visita esta semana do rei emérito á Galiza pretende ser un ensaio xeral do seu retorno ao Estado. Nesta dirección, búscase normalizar a súa presenza entre a poboación, seguindo as indicacións fixadas no comunicado da Casa do Rei de marzo de 2022, onde se estabelecía que este mantería "a súa residencia en Abu Dabi" pero "viaxaría con frecuencia" ao Estado, aloxándose "en ámbitos de carácter privado". Precisamente, esta proposta conta co aval do seu fillo, Felipe VI, do PSOE, do PP, do Poder Xudicial e do Exército. O patrimonio A orixe do seu elevado patrimonio impide a Juan Carlos de Borbón estabelecer o domicilio oficial no Estado español. Fixar neste a súa residencia legal, obrigaríao a estabelecer no mesmo o seu enderezo fiscal, por conseguinte tributar por parte dos bens que a propia xustiza española considera de orixe descoñecida e exporse a algún procedemento no caso de detectarse novas propiedades ao carecer de inviolabilidade desde a súa abdicación. A maiores, o emérito atópase en proceso de transferir parte dos seus bens aos herdeiros, o que levou aos seus netos Froilán e Felipe de Marichalar a fixar o seu enderezo en Abu Dabi, decisión que poderían seguir en semanas outros descendentes. O emérito 'aterra' na Galiza A Casa do Rei fixa o retorno efectivo, que non legal, do monarca emérito para finais deste ano ou comezos do seguinte. Nesta liña, apostan por deixar pasar o longo ciclo electoral que arranca nas eleccións locais e autonómicas de maio e continúa cos comicios estatais de decembro, para evitar interferencias nos proceso. Na mesma dirección, Zarzuela entende que un Goberno do Estado articulado arredor do PP e co apoio de Vox favorecería a operación, unha vez que estas formacións teñen defendido en diversas ocasións o seu retorno e destacado a súa traxectoria. As relacións pai-fillo As relacións entre pai e fillo non son malas, porén interésalles manter unha aparente distancia. As supostas diferenzas magnificadas polos medios de comunicación entre Felipe VI e o Juan Carlos de Borbón libran o primeiro de ter que responder das infraccións das que se acusa ao pai, dar explicacións sobre a súa fortuna e ficar salpicado polos supostos delitos financeiros deste. Ademais, en contraposición co proxenitor, o actual monarca pode lexitimarse como un rei alleo á corrupción, cun alto sentido ético do servizo público e sen as pexas do seu antecesor. Galiza Nova censura a "complicidade" do Goberno español coa visita do emérito a Sanxenxo A intención de Juan Carlos de Borbón de instalar a súa particular corte en Sanxenxo contaría co apoio do seu círculo máis próximo, formado, esencialmente, por xentes de negocios, de profundas conviccións monárquicas e situados en posicións ideolóxicas de dereita extrema. Precisamente tanto Juan Carlos como o fillo son hoxe referencias para ese sector de opinión, até o punto que as diversas sondaxes sobre a Casa Real sinalan que a súa acción só é aprobada polos votantes do PP e de Vox. Os amigos dos emérito O emérito conta na localidade do Salnés cun grupo de coñecidos de vello. Á cabeza dos mesmos, sitúase Pedro Campos Calvo-Sotelo, empresario do turismo, compañeiro desde hai moitos anos de aventuras náuticas de Juan Carlos e presidente do club náutico de Sanxenxo. Campos é neto do político reaccionario José Calvo Sotelo, curmán do ex presidente do Goberno do Estado do mesmo apelido e home de fondas lealdades monárquicas. O alcalde de Sanxenxo, sobre o emérito: "Cando veña, o importante é que se relaxe" Cesar Elízaga Viana e Peter Dubens son outros dous empresarios da corte de Sanxenxo. O primeiro é un madrileño ligado desde hai anos ao club náutico da localidade, cuxo nome logrou relevo tras aparecer nos coñecidos como "papeis de Panamá". O segundo está considerado como a persoa que comezou a recadación de diñeiro para pagar as débedas de Juan Carlos coa facenda estatal.