O Goberno galego e os Colexios Médicos

“A río revolto, ganancia de pescadores”, é dicir, obter beneficio dunha situación caótica ou confusa, especialmente se é de forma inxusta. Despois do éxito da multitudinaria manifestación en Compostela, convocada pola Plataforma SOS Sanidade Pública de Galicia (e non só polo BNG, como dixo o amortizado conselleiro de sanidade), teño que clarificar algunhas das posturas adoptadas por determinados colectivos que queren aproveitar a dinámica de protestas xeneralizadas en todo o país, para conseguir rendementos particulares e afondar na privatización do sistema sanitario público. Refírome aos Colexios de Médicos (que pagamos as e os colexiados de forma obrigatoria), unha entidade anacrónica tal e como está concibida, integrada por persoas que non representan nin o 10% do colectivo e que coa súa política apoian de forma (des)interesada as iniciativas do goberno do PP (á parte de vacacións en apartamentos en Benalmádena e campionatos de golf, xunto con homenaxes aos Reis Magos e rutas turísticas polo Estado español). Nunca os vemos defendendo os intereses das e dos traballadores e menos liderando iniciativas que supoñan melloras nas condicións laborais de quen traballan só na pública. Tamén se apuntaron o éxito da plataforma sindicatos minoritarios que se caracterizan por defender a iniciativa privada, parasitando o sistema público, e solicitando, día sí e día tamén, poder traballar na pública e na privada (ademais de cobrar o complemento de exclusividade: que naceu para fidelizar as e os traballadores da pública) contando co visto bo dos Colexios Médicos e da Administración do PP. Son 75 os días medios de agarda para operacións e 55 para consultas especializadas Ademais, podemos incluír aqueles colectivos que deron as costas á cidadanía e á Mesa de Negociación aberta entre o Sergas e as entidades sanitarias na Galiza. Se os acordos co Sergas son escasos, so é por vontade da Administración do PP, que ten nun caixón as conclusións das 15 comisións técnicas do Consello Técnico de Atención Primaria de Galicia (único órgano que está no DOG para negociar co Sergas). De facerlle caso (e non só son cartos o que se precisa) teríamos un novo modelo de Atención Primaria que estaría elaborado polos diferentes colectivos que participamos no Consello Técnico. A convocatoria MIR Non quero deixar de comentar que a principal desculpa do Sergas e do Sr. Rueda é a “falta de médicos”: menten. Na convocatoria MIR 2023, o Estado oferta 8.550 prazas (a cifra máis alta dende que comezou este sistema) e presentáronse 12.250 licenciadas e licenciados. O propio sistema deixa fóra 3.700. Pero na Galiza ofertou o Sr. Rueda 106 prazas (sen fase de oposición), presentáronse 350 (deixou fóra 244…) e só entraron 90. Está claro que as e os profesionais, nas condicións actuais de precariedade e baixos salarios, non ven o seu futuro na Atención Primaria... sobre todo na galega. E aínda temos que escoitar a desfachatez do Sr. Feijoo: “O PP quere gobernar: porque a sanidade, cando non funciona, o que fai é lista de espera. E a lista de espera é a maior privatización da sanidade". Ademais, estanse convocando as prazas na Galiza... das convocatorias ordinarias de 2020, 2021 e 2022 (que non se fixeron…); foron convocadas no DOG o 05 de xaneiro de 2023. Inclúen, entre outras, 150 prazas de médicas e médicos de familia e 155 de facultativas e facultativos especialistas de área: a todas as luces insuficientes para as necesidades actuais. Como dicimos: menten máis que falan. O PP goberna dende 2009 en que a débeda pública era de 2.900 millóns de euros... En 2023: 12.000 millóns de euros… Gastaron 9.100 millóns máis do que ingresaron! Cada orzamento anual na Galiza é de 11.000 millóns de euros. A pregunta do millón é: Que se fai con estes cartos? Que hai máis importante que a saúde da poboación? Os últimos datos de listas de agarda no Sergas, están en 75 días para operacións e de 55 para consultas especializadas. En Atención Primaria, o propio Sergas admite que o 13% das citas tardan máis de 4 días. E sen contabilizar as e os pacientes de: “Xa os chamaremos”. Estes datos incumpren a propia Lei elaborada polo PP de “Garantía de prestacións sanitarias”. Pouco lles importan as propias leis cando non os favorecen! E que ocorrencia tiveron esta semana? Intentar eliminar a dedicación exclusiva das e dos médicos, para favorecer o traballo dos mesmos no sector privado. E nós dicímoslles que se trata dunha actuación negativa (e ilegal) e que só terá beneficios para as empresas sanitarias privadas, é dicir, un paso máis na privatización do sistema sanitario público. O de que as médicas e médicos “se xubilen aos 72 anos” é xa esperpéntico!