A xornada deste sábado pecha a primeira fase da vacinación infantil -de 5 a 11 anos- na Galiza despois de que esta segunda feira chegase a última remesa de doses pediátricas, pero o país xa cumpriu, tres semanas antes, o obxectivo marcado polo Ministerio de Sanidade de lograr o 70 por cento de cobertura nesta poboación. Así, co 75,3 por cento dos nenos coa primeira dose, a Galiza convértese na primeira comunidade en lograr o fito marcado polo Ministerio de Sanidade e que situaba no 7 de febreiro lograr exceder a barreira do 70 por cento.
A Galiza está moi por riba da media estatal e encara este sábado, coa administración masiva das últimas doses desta primeira remesa, máis de 30 puntos por riba da media do Estado
De feito, a Galiza está moi por riba da media estatal en canto a este proceso e encara este sábado, coa administración masiva das últimas doses desta primeira remesa, máis de 30 puntos por riba da media do Estado, situada no 40,9 por cento.
Desde que se iniciou a campaña de vacinación o 27 de decembro de 2020, a Galiza administrou 6.121.114 doses, segundo os datos actualizados da Consellería de Sanidade, publicados este sábado no Cronómetro de vacinación. Esta cifra supón 27.316 máis que o dato publicado esta sexta feira.
Ademais, a Galiza tamén cumpriu os demais obxectivos de vacinación, en todos os grupos maiores de 40 anos.
En canto á campaña pediátrica, que centrou as últimas semanas xunto coas doses de reforzo, a Galiza conta con 112.493 menores con polo menos unha dose do total de 153.059 que a poden recibir, é dicir, o 73,5 por cento. Séguea en porcentaxe de dispensación de vacina pediátrica Asturias, cun 62,6 por cento de cobertura.
Deste xeito, até o 13 de xaneiro -posto que as deste día 14 aínda non están computadas no informe do Ministerio de Sanidade-, a Galiza vacinou a 8.998 menores de entre 5 e 11 anos, aos que haberá que sumar os nenos e nenas que recibirían a súa dose desde entón até este sábado, día en que conclúe a primeira fase (aínda que poderá haber repescas nos próximos días deste colectivo).
O 85,7 por cento do grupo de 30 a 39 anos conta coa pauta completa de vacinación, o colectivo con menor taxa de cobertura
Seguinte reto, os menores de 40 anos
O seguinte reto que ten por diante a Galiza é a vacinación de menores de 40 anos, que acaba de ser autorizada e ademais permite non esperar aos seis meses da administración da última dose, senón que aos tres xa se pode recibir esta “de recordo”. Na cuarta feira arrinca a campaña para este grupo de idade, após concluír cos maiores de 40.
O 85,7 por cento do grupo de 30 a 39 anos conta coa pauta completa de vacinación, o colectivo con menor taxa de cobertura actualmente (exceptuando a vacinación pediátrica).
O seguinte grupo con menor taxa de cobertura é o grupo entre 20 e 29 anos, que ten unha adherencia actualmente do 86,5 por cento e, de feito, segundo o último informe da Dirección Xeral de Saúde Pública da Xunta, é o colectivo que actualmente presenta maior incidencia de Covid-19, xunto co de 12 a 19 e de 30 a 39 anos.
