Na tarde do segundo día da Feira Internacional de Turismo de Madrid (Fitur), as Fragas do Eume cativaron a atención das persoas que asistiron á presentación deste proxecto enmarcado no Plan de sustentabilidade turística en destino impulsado pola Deputación da Coruña baixo o nome do parque natural. Así, coa colaboración dos concellos da comarca –As Pontes, Cabanas, Monfero, Pontedeume e A Capela–, a institución provincial busca utilizar a súa singularidade medioambiental e a súa contorna natural como motor da estratexia turística que a sitúe no mapa.
A presentación desta iniciativa comezou apenas uns minutos despois das 18 horas coa intervención do vicepresidente da Deputación e responsábel da área de Turismo, Xosé Regueira, quen afirmou que “se houbese que dar unha lista de imprescindíbeis de toda a Galiza sen dúbida as Fragas do Eume estarían en calquera ránking”.
Con todo, Regueira non esqueceu lembrar que este é “o bosque atlántico mellor conservado de Europa”, o que o converte nun ecosistema sensíbel que require dunha “planificación intelixente” para poder ser un espazo turístico e “motor económico dos cinco concellos”.
Así, como é habitual nas presentacións que se realizan no Fitur, o vicepresidente deu paso a unha pequena peza audiovisual no que se recollían imaxes das fragas, dos seus arredores e dos concellos que conectan co río, facendo fincapé no seu carácter patrimonial polos seus “camiños seculares, unha cultura milenaria, unha natureza que foi inmensamente xenerosa e unha historia e cultura popular omnipresentes”.
Posteriormente, a pesar de estar programada, a intervención da directora de Turismo de Galiza, Nava Castro, non foi posíbel debido a motivos de saúde. Con todo, a súa ausencia foi suplida pola delegada da Xunta en Ferrolterra, Martina Aneiros, quen salientou as numerosas infraestruturas que o proxecto prevé pór en marcha.
Entre elas, a delegada fixo fincapé na creación de aparcadoiros para reducir o uso de vehículos privados, na posta en marcha de servizos de alugueiros de bicicletas e as súas correspondentes sendas para percorrer con elas e a creación de rutas de avistamento de aves e de coñecemento da fauna e da flora da contorna.
Así, a delegada quixo subliñar a “clara aposta pola calidade e a excelencia que vai marcar unha diferenza e un valor engadido, situando o noso destino nunha posición máis privilexiada fronte a outros competidores”. Tampouco dubidou ao afirmar que “a Galiza seguirá a ser un dos destinos favoritos de turistas tanto de dentro como de fóra do Estado”.
Turistas conscientes
Precisamente por este difícil equilibrio entre o coidado do ecosistema e o fomento das Fragas do Eume como destino turístico, o proxecto está orientado cara a un público consciente, algo que o vicepresidente da Deputación cualificou de “responsabilidade”.
Neste sentido, o tenente de alcalde de Cabanas, Iago Varela, tamén quixo facer fincapé na "nosa riqueza natural, paisaxística, cultural, etnográfica e gastronómica, un destino para quen viaxa en busca do auténtico" sen esquecer as oportunidades de emprego que este destino pode ofrecer.
Do mesmo modo, Iago Varela deixou clara a aposta que supón este proxecto, vertebrado a través de dous eixos: a “descentralización xeográfica do turismo” e a súa “desestacionalización, algo necesario para conseguir un fluxo de visitantes ao longo de todo o ano”.
Na mesma liña, interveu a concelleira de Turismo das Pontes, Elena López, quen animou as persoas asistentes a sentir "o latexo do Eume" a través dun destino “singular, sostíbel, integrado e responsábel” e das súas oportunidades dentro do deporte, a cultura ou a gastronomía salientando produtos como “os queixos ou os famosos grelos de Xestoso” e asegurando que este era o segredo para crear un turismo baseado nas experiencias e na singularidade.
Tendo en conta todos estes aspectos, na súa intervención, a concelleira de Turismo de Pontedeume, Yolanda Vázquez, non esqueceu falar dos retos que se presentan ante o proxecto, mais non dubidou en asegurar o compromiso existente por parte de todas as institucións "para transformar o desenvolvemento do turismo nun turismo de desenvolvemento".
Así, Vázquez, asegurou que este proxecto fora unha forma de “desdebuxar os límites e fronteiras dos concellos” e desexou ás persoas asistentes que poidan coñecer o territorio para “querer este recuncho da Galiza tanto como o queremos nós”.
O latexo do Eume
O proxecto As Fragas do Eume busca atraer turistas conscientes, que se interesen pola historia e o ecosistema do territorio e que se vexan atraídos polo latexo do río que, como manifestou a concelleira de Turismo de Pontedeume, Yolanda Vázquez, “é o latexo das persoas que viven arredor del”.
