O próximo sábado 21 de Xaneiro a asociación Patrimonea e o lugués Guido Álvarez, coñecido como Guido Guía organizarán un roteiro na localidade de Touro, co obxectivo de dar a coñecer un dos bosques de ribeira mellor conservados da Galiza xunto a un extenso patrimonio material e inmaterial.
Patrimonea, cuxa actividade está especializada na organización de rutas de sendeirismo, nesta ocasión pretende, na compañía de Guido Guía, dar valor á localidade de Touro a través desta actividade.
11 quilómetros
O percorrido contará cun itinerario duns 11 quilómetros de lonxitude e de grao de dificultade baixa-media.
Trátase dun roteiro sendeirista interpretado no cal os organizadores desvelarán curiosidades e datos históricos para que os participantes obteñan unha mirada ampla sobre o territorio e coñezan parte do patrimonio oculto das terras do Ulla.
Darase comezo á ruta ás 10 horas e estenderase até as 2 horas da tarde.
Visitas sorpresa
O programa da actividade incluirá algunha visita adicional sorpresa que permitirá gozar dunha xornada nun entorno rural pouco coñecido e que garda múltiples ‘tesouros’.
O prezo do roteiro é de dez euros por persoa (consultar bonos) e para inscribirse é necesario mandar un correo co nome apelido e documento de identidade aos correos [email protected] ou [email protected].
