Na segunda xornada da Feira Internacional de Turismo (Fitur), un evento que decorre en Madrid, a capital do Estado español, con representación de 152 Estados e no que se agarda que pasen arredor de 250.000 persoas até o domingo, o vicepresidente da Deputación da Coruña e responsábel de Turismo, Xosé Regueira, reuniuse hoxe coa conselleira de Turismo cántabra, Eva Guillermina, e co director xeral de Turismo do territorio, Gustavo Cubero, que se achegaron á entidade provincial para coñecer de primeira man o traballo detrás do Xeoparque Mundial de Cabo Ortegal.
Nese sentido, Cantabria busca desenvolver un xeoparque na costa Quebrada, unha iniciativa para a que a principal recomendación do vicepresidente foi impulsar “o traballo conxunto dos sete concellos cun mesmo obxectivo, o empoderamento da veciñanza e a súa implicación, e a colaboración público-privada”, baseándose na experiencia de cabo Ortegal, que recibiu o recoñecemento da Organización das Nacións Unidas para a Educación, a Ciencia e a Cultura (Unesco) en maio de 2023.
Precisamente o tocante ao Xeoparque de Cabo Ortegal foi abordado hoxe por Cristina García, responsábel de Plans Provinciais da Deputación, que insistiu en que o proxecto vai moito máis alá do turismo, aspirando a desencadear o “desenvolvemento total do territorio”.
Ao respecto, detallou o funcionamento do centro de transformación agraria A Fusquenlla, no que calquera pequena ou pequeno produtor se pode achegar coas súas materias primas para manufacturalas e destinalas á venda ou ao consumo propio.
Tamén salientou a participación do Xeoparque na Olimpíada de Xeoloxía, na que colabora coa Asociación Española para o Ensino das Ciencias da Terra (Aepect). O 7 de febreiro até 11 institutos participarán na fase galega en Cariño.
En paralelo, Regueira formou parte da presentación da Mancomunidade Barbanza Arousa, 'Viaxe a través dos sabores', un acto no que se emitiu un fragmento do documental Voces da Conserva, en cuxo financiamento participou a Deputación, estreado a pasada semana e que se exporá en toda a rede de museos da área.
Empoderamento da muller
O vicepresidente destacou as múltiples facetas dun programa que, defendeu, encádrase perfectamente na estratexia de sustentabilidade turística da Deputación pola súa “autenticidade”, e recalcou que trata do “empoderamento da muller e sobre todo do papel da muller na historia”. A inmensa maioría das persoas que traballaron e traballan na conserva son mulleres.
Asemade, aproveitou o evento para anunciar que Victoriano Castro cedeu á Deputación gratuitamente unha obra súa sobre a historia da conserva –“que fala moito do Barbanza"– e que a entidade se encargará de publicar.
Ademais, subliñou que o turismo sostíbel que fomenta o ente “pasa pola alianza cos diferentes territorios, para acompañalos nos seus plans” e “abrazar a singularidade” dunha provincia “diversa” e con múltiples opcións nunha "distancia moi curta".
A Deputación anuncia un sendeiro ao longo do río Lengüelle
A última parada do día no traballo da representación da Deputación foi no acto organizado pola Mancomunidade para difundir o xeodestino Terras de Ordes, ‘Os lugares do paraíso’, no que se proxectou un audiovisual percorrendo ríos, fervenzas, dolmens, muíños e gastronomía.
Regueira admitiu que a pesar de ser “o xeodestino máis novo da provincia” está “a facer deberes moi importantes”, e fixo público que canda o resto de Administracións públicas a Deputación está a ultimar un sendeiro -que tamén será accesíbel en bicicleta- no río Lengüelle.
Sen saír da comarca, citou tamén a Vía Verde Compostela-Tambre-Lengüelle, a máis longa da Galiza, na que están a punto de comezar os traballos para estenderse até os 36 km.
