Coronavirus Galiza: o novo descenso dos contaxios permite albiscar a fin da sexta vaga da pandemia

Segundo os datos actualizados pola Consellaría de Sanidade esta segunda feira, con rexistros até as 18 horas deste pasado domingo, descenden a 44 as persoas hospitalizadas pola Covid-19 en UCI na Galiza (-1), mais aumentan a 619 as ingresadas noutras unidades convencionais (+23), mentres que 37.977 pacientes permanecen en seguimento no seu domicilio. Hai unha semana había 737 hospitalizados.

Por áreas sanitarias, a presión hospitalaria sobe en todas, agás na de Pontevedra-O Salnés, que fica sen mudanzas con cinco pacientes Covid en UCI e 89 noutras unidades. No caso de Lugo-A Mariña-Monforte, aínda que descenden a catro os pacientes ingresados pola Covid en UCI (-1), aumentan a 58 os ingresados noutras unidades (+9), mentres na Coruña-Cee seguen trece en críticos e soben a 160 os doutras unidades (+5).

Tamén a área de Ourense-Verín-O Barco mantense sen novidades en UCI, con seis ingresados, mais conta con 112 pacientes noutras unidades (+5), á vez que na de Ferrol continúa un en críticos e aumentan a 39 os hospitalizados noutras unidades (+2). En Vigo seguen oito pacientes ingresados en UCI e aumentan a 78 os que se atopan noutras unidades (+1); así como na de Compostela-O Barbanza, que segue con sete en críticos e rexistra 83 noutras unidades (+1).

Os casos activos baixan en 3.500

Os casos activos seguen a minguar nesta sexta vaga e sitúanse nos 38.640, que supoñen 3.571 menos ao haber máis altas (5.220) que novos contaxios (1.652), ao que se engaden tres falecementos. As infeccións activas caeron nas sete áreas sanitarias, coa de Vigo á cabeza (-1.057), seguida de Compostela (-842), A Coruña (-637), Lugo (-371), Pontevedra (-310), Ourense (-197) e Ferrol (-175).

Deste modo, con máis casos activos mantense a área de Vigo, con 8.649; seguida da Coruña, con 8.484; Compostela, con 8.822; Pontevedra, con 4.320; Lugo, con 4.044; Ourense, con 4.035, e Ferrol, con 1.910.

Caen a 1.652 os novos positivos

Os novos contaxios tamén manteñen a tendencia descendente e sitúanse en 1.652 no inicio desta semana, que supoñen 492 menos que os 2.144 deste pasado domingo. Hai unha semana, na segunda feira 7 de febreiro, detectáronse 2.738. Desta forma, as persoas contaxiadas desde o inicio da pandemia ascenden no país a 473.408.

A taxa de positividade —número de PCR positivas por cada cen realizadas— comeza esta semana en 14,3%, tras baixar a 13,8% este domingo, polo que se mantén por riba do 5% que marca a OMS para dar por controlada a pandemia. Aliás, segundo o último informe actualizado a sexta feira 11 de febreiro polo Ministerio de Sanidade, a incidencia acumulada a 14 días na Galiza sitúase en 2.091 casos por cada 100.000 habitantes, mentres que a media estatal fica en 1.462.

Persoas falecidas e curadas

As persoas falecidas pola Covid-19 desde o inicio da pandemia ascenden no país a 3.038, após notificar Sanidade esta segunda feira outras tres vítimas, todas elas con patoloxías previas. En concreto, Sanidade informou de que os tres óbitos se rexistraron o pasado sábado 12 de febreiro e corresponden a dous homes de 83 e 93 anos falecidos na área sanitaria de Ourense e a unha muller de 89 anos que morreu na de Pontevedra e O Salnés.

Pola súa parte, curáronse da Covid-19 desde o inicio desta pandemia 431.781 persoas, tras recibir a alta 5.220 na última xornada no conxunto da Galiza.