Amnistía Internacional pediu ao Ministerio de Interior e ao Defensor do Pobo que investiguen o posíbel "uso excesivo" da forza na actuación policial durante os diferentes días de folga do sector do metal en Vigo.
Tal como lamentou a ONG, as imaxes difundidas do conflito mostran "disparos indiscriminados" contra unha concentración de persoas, algo prohibido polas normas internacionais sobre o uso da forza.
"Ante as cargas policiais rexistradas estes días contra traballadores en folga do sector do metal en Vigo mostramos a nosa preocupación polas posíbeis vulneracións de dereitos humanos cometidas pola Policía Nacional", declarou a coordinadora da campaña Dereito á Protesta de Amnistía Internacional Vigo, Monstserrat Jáudenes.
Por iso, instou á Subdelegada do Goberno en Pontevedra e ao Delegado do Goberno español na Galiza a que investiguen as actuacións levadas a cabo para esclarecer posíbeis casos de "uso excesivo" da forza.
Pelotas de goma
Ademais, a organización solicitou aos diferentes candidatos políticos da circunscrición de Pontevedra un compromiso "real e efectivo" para prohibir o uso de pelotas de goma na próxima lexislatura, por ser "intrinsecamente imprecisas" e pola elevada probabilidade de causar lesións graves.
"A traxectoria das pelotas de goma é imprecisa e indiscriminada, non se pode rastrexar e teñen un risco alto de causar lesións graves", engadiu a portavoz de Amnistía Internacional.