A aliaxe de nacionalismo e marxismo chámase en Galiza Unión do Povo Galego, partido fundado en 1964 e cuxa historia contén boa parte das claves precisas para entender o desenvolvimento da auto-organización política do pobo galego durante as últimas cinco décadas.
Esta historia é obxecto de análise monográfica no caderno AFONDO que Sermos Galiza entregou co seu número 103 esta quinta feira 3 de Xullo. Nel conversamos con Néstor Rego, secretario xeral da UPG, nunha entrevista asinada por Roberto Vilameá. Perguntado por cales son as chaves que explican a continuidade histórica da Unión do Povo Galego, Rego esclarece que a explicación está "en que a UPG respondeu e responde a unha necesidade obxectiva do povo galego, da nación e da clase traballadora".
Para o dirixente nacionalista, o "grande logro" da UPG ao longo das súas cinco décadas de existencia é o de ter construído "os alicerces teóricos e prácticos do nacionalismo contemporáneo". Iso e tamén ter utilizado por vez primeira o marxismo como método de análise "para explicar a situación da Galiza, política, económica e culturalmente, como nación colonizada".
O Palacio de Congresos de Santiago de Compostela acolle este sábado (19 h) o acto comemorativo do 50 aniversario da UPG
Na entrevista, o secretario xeral da UPG referérese á procura da unidade do nacionalismo como un dos obxectivos que persegue non só este partido, mais tamén a fronte, o BNG, na que se acha integrado.
Auto-organización e soberanía
A este respeito, Rego afirma literalmente o seguinte: "A nosa actuación como partido sempre tivo como prioridade a unidade das forzas patrióticas como mellor forma de asegurar a defensa dos intereses das clases populares galegas e de Galiza como nación. Esta unidade concretouse durante os últimos 30 anos no BNG que para nós continúa a ser a mellor expresión da unidade na pluralidade do nacionalismo". E engade: "Calquera outro proceso de unidade, para alén de implicar a necesaria vontade de outros que hoxe é evidente que non existe, terá de pasar, como estabeleceu a XIV Asemblea do BNG, polo respecto e a práctica da auto-organización e da soberanía".
A íntegra desta entrevista podes achala no nº71 do AFONDO, caderno de análise que fai parte do nº 103 de Sermos Galiza. Disponíbel nos quiosques e na nosa loxa.