A portavoz de Sumar no Congreso, Marta Lois, asegurou esta quinta feira que en breve se coñecerá o candidato ou candidata da formación ás eleccións da Galiza do 18 de febreiro, dado que dispoñen de "bos perfís" para elixir a mellor cabeza de lista. Nunha entrevista coa axencia Europa Press, manifestou que Sumar está en condicións para afrontar esta cita electoral, pois despregaron un "traballo intenso" no territorio desde hai meses, e deixa claro respecto ao deseño da candidatura que "todo chegará ao seu tempo" e cedo haberá unha decisión.
"Estou segura de que a decisión final que se adopte para escoller un candidato ou candidata vai ser o mellor perfil, a mellor persoa para representar a Sumar Galicia", remarcou. Preguntada sobre se unha opción pode ser o portavoz da formación na Galiza, Paulo Carlos López, dixo que é un bo perfil na portavocía e insistiu en que o seu referente electoral será "calquera persoa" que Sumar Galicia e a súa promotora "teña a ben valorar". É máis, debullou que mostra do "impulso político" que están a exercer na esquerda é o elenco de dita promotora no país, onde emerxen figuras de "gran talento e valía" con diferentes perfís profesionais, políticos, sindicais, sociais e do movemento feminista.
Á súa vez, Lois volveu reiterar que ela non está na terna de candidatábeis posto que o seu "compromiso" e "responsabilidade máxima" atópase agora no Congreso. No entanto, destacou que está implicada tanto na promotora como na futura campaña electoral. Tamén subliñou que a líder de Sumar, Yolanda Díaz, xa está de feito "envorcada" na campaña como se puido ver co seu recente acto na Coruña onde o proxecto fixo a súa posta de longo.
Sumar non chega "tarde", e será "decisiva"
Cuestionada sobre o feito de que ante esa convocatoria electoral Sumar non teña definido nin alianzas nin candidato, Lois manifestou que puidese dar a sensación, do mesmo modo que nas estatais, que ante o adianto electoral chegaban "tarde" ou sen os "deberes feitos", cando en realidade xa contaban cun labor intenso que quedou demostrada o 23-X cun resultado "moi positivo".
Desta forma, a portavoz parlamentaria precisou que para este ciclo electoral están "máis que preparados" e que na Galiza tamén operan cunha metodoloxía "moi Sumar", que primeiro consiste no chamado "proceso de escoita" para construír un espazo político "aberto á cidadanía", cunha "axenda útil" para os galegos e erixirse como unha forza "decisiva e estratéxica" para lograr a alternativa "a 14 anos de parálise" provocada polas políticas do PP.
"Sumar Galicia vai ser clave, é a panca e coa súa presenza no taboleiro do espazo político vai a se posible o cambio en política", salientou Lois, para augurar que o seu espazo xogará un papel importante para mobilizar o electorado de esquerda. De feito, apuntou que nas pasadas eleccións xerais, coa presenza de Sumar, o bloque progresista en conxunto logrou 800.000 votos mentres que o líder do PP, Alberto Núñez Feixoo, cimentou a súa maioría absoluta nas últimas galegas sobre a base de 600.000 sufraxios.
A ruptura de Podemos no Congreso conxelou as conversas
Cuestionada sobre por se dá por descartada a confluencia con Anova e se entendía o seu rexeitamento a confluír, Lois afirmou que van seguir falando con esta formación e con outros partidos, dado que Sumar "non é unha casa fechada", senón un "espazo aberto" ás "persoas e forzas progresistas". Tamén sinalou que no caso do ex alcalde de Santiago e portavoz de Anova, Martiño Noriega, compartiu con el política municipal durante oito anos e existe unha "relación de afecto" e de "vínculo de traballo". "Non creo que sexa unha cuestión de descartar a Anova —que xa anunciou publicamente o seu 'non' a esta confluencia—, a nosa man está tendida en xeral a ese marco progresista", profundou.
Respecto de se se retomará o diálogo con Podemos sobre unha eventual confluencia, Lois insistiu que Sumar é "unha casa aberta que tende a man", aínda que recoñeceu que a "saída unilateral" do grupo plurinacional no Congreso que adoptou o partido morado a nivel estatal condicionou " un pouco a situación de cara ao que son as conversas".
"Sen présas" para as europeas
En canto a se a decisión de Podemos de concorrer pola súa conta aos futuros comicios europeos e a súa aposta pola ex ministra Irene Montero como a súa cabeza de lista obriga Sumar a traballar xa nunha candidatura a esta cita electoral, Lois respondeu que non e que agora a súa prioridade está na Galiza e Euskadi. É máis, manifestou que xa traballarán "cando sexa o momento" no horizonte das eleccións europeas e en que disporán do "mellor" candidato ou candidata, dado que Sumar ten "moi bos perfís".
