Inés Rey tiña como principal apoio o do presidente da Deputación, Valentín García Formoso, crítico co secretario xeral Gonzalo Caballero e representante da liña sanchista. Conseguiu tamén o respaldo dos dous candidatos —Rafael Aranguena e Juan Ignacio Borrego— que ficaron eliminados na primeira volta das primarias. Tiña canda ela tamén a concelleira Yoya Neira, persoa moi próxima a Pedro Sánchez.
O candidato derrotado, o portavoz en María Pita José Manuel García, representaba grosso modo os sectores do partido liderados pola ex concelleira Mar Barcón, nostálxicos da etapa máis gloriosa do partido na Coruña, a encabezada por Francisco Vázquez (alcalde entre 1983 e 2006). Era a baza de Gonzalo Caballero, mais o secretario xeral do partido optou no confronto por un perfil baixo, probabelmente consciente do potencial interno de Inés Rey.
García non demorou en asumir responsabilidades políticas após a derrota e esta segunda feira anunciou o seu abandono da primeira liña: non só abandona a portavocía do PSdeG no salón de plenos do concello, senón que tamén entrega a acta de concelleiro.
