A Asociación de Defensa Ambiental Salvemos Cabana criticou este domingo o proxecto de lei de acompañamento dos orzamentos da Xunta da Galiza para o próximo ano, que recolle a declaración de interese público "superior" da planificación, construción e explotación de parques eólicos de competencia galega.
Segundo Salvemos Cabana, esta normativa converte o proceso de avaliación ambiental en "papel mollado" e "vai en contra do interese xeral da cidadanía". Ademais, denunciou esta asociación, o interese público "superior" do Goberno galego é "o interese das grandes empresas do oligopolio eléctrico".
Nunha comunicado aos medios, a organización explica que a lexislación estatal e comunitaria sobre avaliación ambiental require que se teñan en conta todos os aspectos de calquera proxecto mantendo un carácter global e a súa integridade, o que no caso dos parques eólicos implica as súas liñas de evacuación e as súas infraestruturas asociadas, que tamén teñen un gran impacto sobre o territorio.
Neste sentido, na súa opinión, "o procedemento de avaliación ambiental queda gravemente danado coa modificación lexislativa fomentada pola Xunta da Galiza". Así mesmo, consideran que "retorce a conveniencia a lexislación comunitaria".
O proxecto de lei, explica, enmarca a reforma dentro do marco comunitario "para acelerar o despregamento de enerxías renovábeis". Mais "esquecendo que o Principio de Cautela ou Precaución é un dos piares reitores da política europea cuxo enfoque proactivo busca protexer o medio ambiente e a saúde pública".
