martes 14.07.2020
Política

O PSdeG urxe á Xunta a que lle faga "contratos estábeis" ás profesionais sanitarias

Gonzalo Caballero defende a necesidade de implementar "unha nova política de persoal" no Servizo Galego de Saúde (Sergas).
Gonzalo Caballero na rolda de prensa desta sexta feira (PSdeG).
Gonzalo Caballero na rolda de prensa desta sexta feira (PSdeG).

O secretario xeral do PSdeG, Gonzalo Caballero, reclamou esta sexta feira á Xunta "unha nova política sanitaria" que, no camiño de "fortalecer" o sistema público, "ofreza contratos laborais estábeis e dignos a todas as profesionais dispoñíbeis na Galiza".

"Pedímosllo hai un mes á Xunta, ao inicio desta crise, e non se fixo", recalcou o líder das socialistas galegas, que fixo fincapé en que, transcorrido máis dun mes dende o decreto do estado de alarma, "hai que facelo xa, incorporando de maneira estábel a médicos e médicas, enfermeiros e enfermeiras, auxiliares de enfermaría e celadoras".

"Ademais dos aplausos de cada día ás oito da tarde, as profesionais teñen que ter un recoñecemento laboral e os complementos adecuados para o traballo en situación de risco que están facendo", esgrimiu Caballero, que require "unha nova política de persoal" no Servizo Galego de Saúde (Sergas).

Neste sentido, o socialista sinalou que é "inaceptábel" que se chegara a comunicar ás enfermeiras que atenden os casos de coronavirus en Compostela a rescisión dos seus contratos, "unha decisión que o Sergas tivo que rectificar ante as denuncias dos sindicatos e dos colectivos de traballadoras".

comentarios