A alcaldesa en funcións da Coruña, a socialista Inés Rei, e o candidato do BNG á Alcaldía e portavoz en funcións desta formación no consistorio coruñés, Francisco Jorquera, mostráronse abertos a buscar "fórmulas" para garantir un goberno "progresista" na cidade.
Así o manifestaron en declaracións aos medios de comunicación, no acto celebrado no Pazo Municipal de María Pita con motivo dos actos conmemorativos da Policía Local.
Rei emprazou a agardar ás reunións das formacións políticas a nivel interno para logo comezar a falar por parte de ambos os grupos, após confirmar que polo momento non hai un protocolo de negociación estabelecido.
Cuestionada en todo caso sobre se haberá unha alcaldesa socialista (nestas eleccións o PSdeG obtivo 11 edís e o BNG catro, fronte aos 12 do PP), remitiuse ao respaldo do electorado. "Os cidadáns falaron, apostaron por un goberno progresista, con maioría de esquerdas". "Xa falaremos das fórmulas", engadiu ante a pregunta de se haberá un goberno bipartito.
Posicionamento do BNG
Pola súa banda, Jorquera asegurou que hai que esperar á proclamación definitiva dos resultados e ás reunións dos partidos. Con todo, mostrou a "máxima disposición" para garantir a gobernabilidade.
Sobre o posicionamento do BNG, asegurou que virá definido polos “intereses da cidadanía" e cunha actitude "firme e exixente" por parte do seu partido. "Hai moitos aspectos que hai que corrixir", precisou en referencia ao actual mandato e os "incumprimentos" de asuntos.
En canto a como será a negociación, avanzou que haberá que acordar "cales deben ser as prioridades, os eixos de acción do goberno do próximos catro anos" e tamén "exixir mecanismos que garantan o cumprimento do acordado".
Respecto a se o BNG entrará no Goberno, remitiuse ao exposto durante a campaña electoral. "A vocación do BNG non era entrar en ningún Goberno, é ser Goberno, por iso todas as hipóteses están abertas, dependerá do grao de acordo a fórmula final".
