As principais mareas municipalistas volveron reunirse esta terza feira após o longo ciclo electoral que incluíu dous comicios estatais e un municipal. Foi en Ferrol e coa presenza das ‘catro grandes’: Marea Atlántica, Compostela Aberta, Marea de Vigo e Ferrol en Común. “Os que estamos aquí representamos máis de 50.000 persoas que nos votaron en maio”, lembrou Martiño Noriega, ex alcalde compostelán e portavoz de Compostela Aberta.
Foi unha primeira xuntanza con vocación de continuidade: “Estes encontros de coordinación terán continuidade e iranse ampliando no futuro coa presenza doutras formacións municipalistas”, manifestan as organizacións participantes nun comunicado.
No encontro participaron Jorge Suárez e Xiana Penedo, por Ferrol en Común; María García e Iago Martínez, pola Marea Atlántica; Martiño Noriega e Marta Lois, por Compostela Aberta; e Rubén Pérez e Oriana Méndez, pola Marea de Vigo.
Sobre a mesa: os retos do espazo municipalista, tendo moi presente as eleccións galegas deste ano; ou como artellar sinerxias e expandir os posicionamentos en torno á “xustiza social, compromiso ambiental...”.
Para Rubén Pérez, un obxectivo fulcral é combater a austeridade: “É fundamental a derrogación de leis como a Lei Montoro, que leva anos oprimindo as administracións locais e impedindo o desenvolvemento de políticas con sostibilidade democrática e social”.
Jorge Suárez reivindicou unha “política de proximidade, que poña as persoas no centro”, e incidiu en que estamos nuns momentos “cruciais” nos que se pode descabalgar a dereita da Xunta.
