PP, PSOE e Ciudadanos sumaron os votos para confirmar esta terza feira a negativa da Mesa do Congreso a que En Marea e 'A La Valenciana' teñan grupo propio, desestimando os recursos que presentaron. As confluencias deberán decidir agora se, tal e como anunciaron, van ir ao Tribunal Constitucional para defender o dereito a un grupo de seu.
Iñigo Errejón, portavoz parlamentar de Podemos e secretario Político culpou PP, PSOEe Cs de se negar a recoñecer a plurinacionalidade do Estado español. “Merecían ter grupo”, dixo. O argumento esgrimido pola mesa é o artigo 23.2 do Regulamento do Congreso, que impide, afirman, que deputados do mesmo partido constitúan grupos separados e impide tamén que o fagan formacións que non se enfrontaron perante o electorado. Errejón dixo que os deputados galegos e valenciáns teñen garantida a súa visibilidade e voz propia dentro do grupo confederal.
Os catro deputados de Compromís volverán ao grupo mixto, como xa fixeran na anterior lexislatura. Un grupo que aumentou considerabelmente ao ter que integrarse nel os 8 deputados de Convergència tras o non do Congreso ao seu grupo parlamentar.
