Marea Atlántica, a formación municipalista que chegou a gobernar a cidade da Coruña, fixo un chamamento para votar a "todas aquelas forzas de esquerda transformadora capaces de articular unha maioría suficiente que substitúa ao Partido Popular no Goberno da Xunta da Galiza".
Nun comunicado, Marea Atlántica apunta que é municipalista e está centrada na Coruña, mais deixa claro que "non é indiferente" para ela quen goberne a Xunta.
Por tal motivo, apela a desbancar ao PP do Goberno galego "en beneficio da xustiza social, da igualdade, do feminismo e do medio ambiente". Así, fai unha chamada “á responsabilidade" das forzas de esquerdas para "construír alternativas políticas de longo percorrido en todas as escalas".
Todo isto á vez que mostra "certa perplexidade" polo sucedido nestas eleccións galegas ao atoparse o espazo da esquerda "máis fragmentado que nunca". "Incluso as forzas que abandonaron a confluencia na nosa cidade preséntanse aos actuais comicios por separado", lamenta.
Nas eleccións municipais de 2023 MA ficou sen representación na Coruña. Entón admitiu que os resultados son "pésimos" e afirmaba que non caben "matices nin paliativos" tras obter 5.267 votos, "150 menos dos necesarios para obter un escano".
