A Coordinadora da Marea Atlántica convocou para o 10 de xuño un encontro, ao que están chamadas todas as persoas asinantes do seu manifesto, para determinar o "novo rumbo" da formación tras a derrota electoral que lles deixou fóra da corporación municipal coruñesa.
Nun comunicado, explica que o obxectivo é "avaliar conxuntamente" os resultados das eleccións municipais tras un 28 de maio que cualifica "negro".
E é que, desde a Marea, aseguran que "ninguén esperaba un castigo tan duro ao conxunto das forzas progresistas" fronte aos resultados obtidos polo PP.
"O espazo do cambio sufriu tamén un duro revés", admite a Marea Atlántica, que cualifica de "severo" o retroceso na Galiza, con excepción dos resultados, engade, de Sadamaioría e Rianxo en Común.
“Resultados pésimos”
No caso da Marea Atlántica, admite que os resultados son "pésimos" e apostila que non caben "matices nin paliativos" tras obter 5.267 votos, "150 menos dos necesarios para obter un escano".
"Temos que asumilo, reflexionar e traballar aínda máis para volver", apostila nun comunicado no cal vinculan o sucedido cunhas eleccións celebradas baixo un "marco estatal".
Ademais, admite a existencia de "motivos para a desafección" e, alude, á marcha de Esquerda Unida e Podemos, que conformaron un grupo, 'Por Coruña', que tampouco obtivo representación.
"A ruptura do espazo de confluencia volveu ser protagonista", lamentan, á vez que apelan ao "sentidiño" para unhas eleccións "críticas", apostilan sobre as estatais convocadas para o 23 de xullo.
