Baixo o lema "A defensa da terra é autodefensa" partiu ás 12.30 horas deste 25 de xullo da Alameda compostelá a manifestación convocada polas Assembleias Abertas Independentistas (AAI), que por terceiro ano consecutivo tomou as rúas da capital para recuperar a "necesaria presenza" nela dun movemento independentista galego que sitúan "á esquerda do autonomismo". A marcha deste ano tivo como principal reivindicación a "loita" contra unha "invasión eólica" que, aseguraron, "ameaza" o país na actualidade.
"No contexto dunha crise climática fruito do capitalismo que arremete contra a vida das pessoas e o planeta, Galiza ve-se ameaçada pola invasom eólica", salientaron na lectura do seu manifesto, ao tempo que chamaron a "artelhar poder popular contra os megaprojetos".
No escenario actual, afirmaron, "nom está en jogo um modelo energético, tal e como nos tratam de vender os apóstolos dum capitalismo disfraçado de verde, senom que o que estamos a denunciar som as manifestas agressons tanto ao meio coma á vizinhança dos lugares afetados, que vem seriamente alteradas as suas vidas e entornos".
As Assembleias ven no contexto de desenvolvemento enerxético actual un "espolio" en favor "das oligarquias de sempre, bem sejam em forma de caciques locais ou de multinacionais estrangeiras".
“Já nom chega con alegaçons legais às que a Xunta fai ouvidos surdos. Cumpre defender a nossa terra por meio da açom mais direta”, agregan desde as AAI.
Lingua galega
A situación da lingua galega tamén colle relevancia nas reivindicacións das AAI e no seu manifesto indican que “nom podemos disimular a nossa profunda preocupaçom pola deriva esmorecedora da nossa língua”.
O auxe do fascismo e do liberalismo así como unha reivindicación do feminismo tamén teñen oco no manifesto das Assembleias Abertas Independentistas.
