A maioría da poboación galega estará gobernada por Alcaldías do BNG e do PSdeG

O BNG e o PSdeG deron inicio esta segunda feira, 5 de xuño, ás súas conversas para facilitar Gobernos alternativos ao PP naquelas localidades onde a dereita non logrou maioría absoluta. As direccións de ambas as formacións deixarán en mans das súas organizacións locais a concreción da fórmula de colaboración en cada un dos municipios. Porén, comprometéronse a sumar os seus votos nas sesións plenarias de constitución das corporacións, co obxectivo de impedir o acceso ás Alcaldías dos candidatos populares. Neste sentido, a opción adoptada por nacionalistas e socialistas sitúase na liña do acordado en 2019. Os equipos negociadores do BNG e do PSdeG teñen aínda por diante moito traballo. Á definición do marco xeral de relación fixado no encontro desta segunda feira en Compostela, deberá sumarse nos próximos días as resolucións das casuísticas concretas de determinados municipios, onde as dinámicas locais poden complicar máis o feche dos pactos. Porén, a delegación do BNG e a do PSdeG quixeron deixar claro nesta primeira reunión a súa disposición a impedir Gobernos da dereita nos concellos galegos, na liña do avanzado por ambas as formacións durante a pasada campaña electoral. BNG A responsábel de Política Municipal do BNG, Carme da Silva, que integrou a comisión negociadora dos nacionalistas canda os membros da executiva nacional Bieito Lobeira e Rubén Cela, explicou ao comezo da xuntanza que “as eleccións locais deixaron un mapa político propio" na Galiza, que permitirá que se "poidan configurar Gobernos alternativos ao PP". Neste sentido, asegurou que “onde sexa o PSdeG quen teña máis votos para configurar unha alternativa ao PP, pois será apoiado polo BNG”. Da Silva explicou que “o fundamental” é facilitar a investidura de Gobernos alternativos ao PP. Nesta liña, indicou que “a vontade da sociedade galega é de configurar unha alternativa clara ao PP e a sociedade está a esperar que lle deamos unha resposta de forma clara” e deixou para os seguintes encontros “outras cuestións como coalicións de Goberno ou pactos, son cuestións que poden formar parte do proceso de forma sistemática ou atendendo ás necesidades e características de cada un dos concellos”. PSdeG O secretario de Organización do PSdeG, José Manuel Laxe, que acudiu á reunión acompañado dos dirixentes socialistas Carmela Silva -presidenta en funcións da Deputación de Pontevedra- e Alberto Varela -rexedor de Vilagarcía e presidente da Fegamp-, destacou que acoden ás negociacións coa "idea de que se conformen Gobernos progresistas" alí onde o PP non sume maioría absoluta. Nesta dirección, significou que “cremos que é importante este marco de diálogo co BNG. Forma parte da tradición e veremos até onde somos capaces de chegar”. Laxe incidiu que "o Partido Socialista vai falar de que poida haber o maior número de Gobernos progresistas na Galiza, respondendo tamén ao que dixo a poboación". A este respecto, recordou que o PP "obtivo 38% dos votos" polo que "as forzas políticas situadas na esquerda" son "maioritarias". Nesa liña, afirmou que “hai que lembrar que o Partido Socialista xa gobernaba máis da metade da poboación e eu creo que estamos en condicións de seguir gobernando máis da metade da poboación dentro do conxunto dos concellos galegos”. Os acordos adoptados esta segunda feira entre o BNG e o PSdeG despexan o futuro político de 69 concellos, cuxa Alcaldía depende dun acordo entre estas formacións. Así, os socialistas obterían outros 50 bastóns de mando máis aos conseguidos por maioría absoluta, atopándose entres estes os de cidades como Lugo ou A Coruña, importantes núcleos de poboación como Redondela ou Vilagarcía, e cabeceiras de comarcas como Betanzos e un grupo importante de vilas medias. Pola súa parte, o BNG sumaría outras 19 Alcaldías ás 18 xa confirmadas, atopándose entre estas as das cidades de Compostela e Pontevedra, así como Arzúa, Fene, Muros, Barreiros ou Samos, entre outras. Deputacións A situación está, tamén, encarreirada nas deputacións da Coruña e Lugo. Se no primeiro caso o aumento da representación do BNG, que pasa de 4 a 6 representantes, fortalece a posición da formación nacionalista e adianta mudanzas no reparto do poder interno, no segundo non se agardan cambios ao reeditarse os resultados de 2019 . Porén, nunha e outra institución dáse por feito un Executivo de coalición, presidido por un socialista e cun nacionalista na Vicepresidencia. O escenario máis complexo dáse naqueles concellos e deputacións onde a alternativa á dereita pasa polo acordo con outras formacións diferentes a BNG e PSdeG. Nesta casuística, aparecen municipios como Noia, onde o acceso dos socialistas á Alcaldía require dunha formación independente de dereitas; Sada, onde o PSdeG nega o seu apoio á candidatura do anterior rexedor, Benito Portela; Vilalba, onde a candidatura municipalista aspira á Alcaldía, ou Viveiro, onde independentes negocian co PP e co PSdeG. Ourense Ourense mereceu unha posta en común das equipas negociadoras nacionalistas e socialistas. A situación do Goberno da cidade e da Deputación estivo na orde de traballos da xuntanza desta segunda feira, 5 de xuño,, se ben non se concretou ningunha alternativa. Porén, uns e outros apostaron por unha mudanza política na orientación defendida polo BNG e o PSdeG para outras institucións galegas. O PP prepárase para a oposición en seis das sete cidades da Galiza Ferrol será a única cidade galega con rexedor do Partido Popular. A localidade, cunha poboación de 64.158 habitantes, está por baixo dous outros seis principais núcleos urbanos da Galiza, que suman 920.185 residentes. Agás Ourense, que suma 103.756 cidadáns e cidadás, onde se prevé que repita Gonzalo Pérez Xácome, A Coruña, Compostela, Lugo, Pontevedra e Vigo serán dirixidas por Alcaldías nacionalistas e socialistas. O Partido Popular prepárase xa para outros catro anos de oposición na Galiza urbana. Así, os populares lugueses avanzaron esta segunda feira o seu plan de traballo para este mandato, nomeando como vicevoceiro Enrique Rozas, que sucede no cargo Antonio Ameixide, que ocupara un escano na Deputación de Lugo. Neste sentido, a alcaldábel da formación na cidade, Elena Candia sinalou que “faremos un traballo positivo e unha fiscalización esixente e firme do bipartito. Seremos os ollos e os oídos de todos os lucenses os 365 días, as 24 horas tanto dos que votaron ao PP como dos que non o fixeron”. Precisamente, Elena Candia foi unha das grandes derrotadas da xornada electoral de 28 de maio, o que pon en risco a súa continuidade como presidenta do partido na circunscrición de Lugo. As cousas non figuran mellor para os populares da Coruña, que esta segunda feira recibiron na súa Xunta Directiva a Alfonso Rueda. Neste caso, o PP non só non consigue gobernar en cidades como A Coruña e Compostela, senón que fican en mans de nacionalistas ou socialistas grandes núcleos como Ames, Carballo ou Culleredo.