Un acordo programático de 92 medidas para Lugo é a base do pacto de Goberno entre o Partido Socialista e o BNG para a cidade até 2027. Un pacto que esta quinta feira escenificaron a alcaldesa e o tenente de alcalde en funcións, Lara Méndez (PSdeG) e Rubén Arroxo (BNG), coa sinatura do acordo.
Tanto socialistas como nacionalistas seguirán á fronte das mesmas áreas municipais que tiñan neste mandato que finaliza mañá. O acordo programático entre ambas as dúas formacións aposta por avanzar co actual modelo de cidade, apostando por un “urbanismo sostíbel”, dinamizar os barrios, fomentar o desenvolvemento económico e do emprego e apoiar o turismo de calidade, entre outras accións.
Lara Méndez e Rubén Arroxo teñen claro que as Administracións galegas e estatal deben cumprir os seus compromisos coa cidade. Así, no acordo sinálase que demandarán que se reforme o proxecto da Rolda Leste, que se constrúa vivenda pública na cidade, que se rehabilite o barrio medieval da Tinaría, ou que se cofinancie o saneamento e abastecemento do rural.