A presidenta do Congreso, a socialista Francina Armengol, decidiu axendar para os días 26 e 27 de setembro o debate de investidura do presidente do PP, Alberto Núñez Feixoo, o que lle permite dar o prazo que pedira o candidato para as súas negociacións e elúdese o risco de votar en Nadal en caso de repetición electoral.
Os grupos parlamentarios do Congreso non quedan constituídos formalmente até a vindeira segunda feira, cando estea prevista que a Mesa da Cámara dea o visto e prace ás inscricións realizadas, e despois reunirase a Xunta de Portavoces para organizar o debate.
Para evitar o risco dunhas hipotéticas eleccións en Noiteboa ou Noitevella, só había dúas opcións para o primeiro debate de investidura: a próxima semana, que levaría ao domingo 17 de decembro, ou xa a partir do 25 de setembro.
As preferencias de Feixoo
Núñez Feixoo xa advertira de que vía precipitado someterse a un debate de investidura a próxima semana e que necesitaba tempo para as súas negociacións coas formacións parlamentarias. Ademais, os grupos parlamentarios do Congreso non están constituídos.
Armengol falou esta terza feira pola noite co candidato e aceptou as súas suxerencias dándolle tempo para as súas reunións cos grupos. Coa data escollida, comunicada a Feixoo e ao resto de portavoces parlamentarios, a presidenta do Congreso considera que "se dá un tempo máis que prudencial para que o candidato poida realizar as negociacións oportunas cos representantes das diferentes formacións políticas".
Así, o plan é iniciar o debate de investidura o 26 de setembro co discurso do candidato e organizar ao día seguinte, 27, a primeira votación, para a que se require maioría absoluta. En caso de non obtela, haberá unha segunda votación 48 horas despois, o 29, na cal bastará con máis votos a favor que en contra.
E se fracasa?
Con todo, as posicións manifestadas polos distintos partidos con representación parlamentaria apuntan a que Feixoo non superará as votacións de investidura, co que o rei terá que abrir unha nova rolda de consultas na cal o socialista Pedro Sánchez se perfila como alternativa.
En todo caso, o risco de repetición electoral persiste, pero a data escollida por Armengol permite descartar unha xornada electoral o 24 de decembro ou o 31 de decembro. De necesitarse, xa sería o 14 de xaneiro.
Na súa comparecencia ante os medios, Armengol non mencionou o risco de repetición, pero si remarcou que os antecedentes amparan a súa decisión xa que, salvo nos anos en que había maiorías absolutas claras, "a media do tempo transcorrido nas pasadas lexislaturas foi de aproximadamente un mes" desde a designación de candidato, e nesta ocasión van transcorrer 35 días.
