Cuestionado sobre a situación actual en Catalunya, Feijóo sinalou que o Principat foi “exemplo do que non debía ser” ao tempo que tachaba o president no exilio da Generalitat, Carles Puigdemont, de “perder o sentido da realidade”. O político popular continuou coa súa batería de ataques ao líder do independentismo catalán acusándoo de ser un “elemento nocivo” para a sociedade catalá que “desconecta da realidade”.
O líder do Executivo galego tamén fixo listaxe sobre as dificultades que o procés tería provocado, segundo el, para Catalunya, como o aumento da débeda pública ao Estado español. “Catalunya é máis pobre que hai uns anos”, comenta sobre un país que actualmente figura como unha das comunidades autónomas máis prósperas de todo o estado.
Feijóo enmarca estas declaracións dentro da decisión do presidente do goberno, Mariano Rajoy, de forzar a convocatoria de eleccións autonómicas por causa da Declaración Unilateral de Independencia que se votou no Parlament.