Estes son os 50 nomes que fan parte da promotora de Sumar na Galiza

Redacción

14/dec./23 - 10:43 Actualizado: 14/dec./23 - 19:16

Seguinte

A promotora de Sumar Galicia preséntase esta quinta feira publicamente con 50 nomes tras a súa constitución o pasado mes de novembro. O seu obxectivo era, segundo indicaban, incluír persoas de todo o espectro da "esquerda á esquerda do PSOE" e, finalmente, lograron 'fichar' o ex deputado socialista Juan Díaz Villoslada, á até hai unha semana secretaria de Organización de Podemos Galicia, Gloria Alonso Domínguez, e ao que foi portavoz do BNG en Teo, Manuel Barreiro.

Sobre a incoporación de Gloria Alonso, Podemos Galicia quixo precisar aos medios que pediu a baixa como rexistrada da formación violeta o pasado día 11 e que o seu posto pasou a estar ocupado por Susana López, anterior secretaria de Finanzas. Neste sentido, trátase da única figura da executiva de Borja San Ramón e a súa contorna que deu este paso, polo menos, que transcendese até este momento.

Algúns dos nomes da promotora xa eran coñecidos. Ademais do seu portavoz, Paulo Carlos López (que estivo vinculado a Compromiso por Galicia), forman parte dela nomes como o do ex alcalde de Ferrol, Jorge Suárez e o catedrático e vicesecretario da Real Academia Galega Henrique Monteagudo.

A vicepresidenta segunda do Goberno e líder de Sumar, Yolanda Díaz, estivo na Galiza nunha viaxe de carácter privado, aínda que, neste tempo, aproveitou para supervisar a situación do seu partido.

Outras formacións

Ademais desas formacións, na promotora figuran outros membros de mareas, como a que fora concelleira de Compostela Aberta Noa Morais, a que fora candidata ao Senado nas pasadas eleccións por Sumar Marilar Aleixandre, o ex alcalde da Pobra do Caramiñal Xosé Lois Piñeiro, moi ligado tamén a Marta Lois, ou Esther Sobrado Janeiro, que en 2012 foi nas listas de Democracia Ourensá pero que despois se ligou a unha das mareas que houbo na cidade de As Burgas.