A Deputación de Lugo tentará impugnar o decreto polo que se fixa o re-pagamento farmacolóxico para doentes crónic@s. Neste senso, o seu vice-presidente, o nacionalista Antón Veiga, anunciou que o goberno provincial presentará un recurso perante os tribunais á fin de impedir a aplicación da resolución aprobada polo goberno español pola que se fixa o re-pagamento da medicación en doentes crónic@s.
A decisión do organismo provincial devén da petición presentada pola Iniciativa galega pola Gratuidade da Sanidade en que demandan das forzas políticas con representación no Parlamento e Deputacións un posicionamento contrario ao re-pagamento. Neste senso, Antón Veiga asegurou agardar que "o resto das institucións interpeladas por este colectivo social procedan a recorrer diante da xustiza ordinaria estes copagos". Segundo sinalou o nacionalista, "a práctica totalidade das autonomías" amosaron xa o seu rexeitamento á entrada en vigor da norma, mesmo as do PP como Madrid, Castela-León, Castela-A Mancha ou Valencia.
O Presidente da Xunta de Galiza demostra non ter sentimentos e remata por converterse nun auténtico pesadelo para os galegos, un perigo público que pon en risco a vida dos doentes crónicos, un autentico killer para enfermos de cancro, de SIDA ou de hepatite”, espetou Veiga ao tempo que asegurou "non imos consentir este novo repagamento, este novo imposto á enfermidade" que tentarán impugnar pola vía xudicial.
Aliás, o vice-presidente da Deputación de Lugo lembrou que o organismo provincial vai abrir unha liña de axuda para aqueles concellos insubmisos ao re-pagamento a través da Área de Benestar. "Unha liña de axudas en concorrencia competitiva", explicou Veiga á que poderán concorrer os Concellos de Lugo que asuman o copago e que ten como obxectivo cubrir os gastos daqueles doentes crónicos que agora se ven afectados por esta medida".
