O 6 de abril de 1981, o rei Juan Carlos I sancionaba a lei orgánica pola que se aprobaba o Estatuto galego. Condicionado polo papel reservado á Galiza nos deseños dos aparatos estatais e pola vaga centralizadora iniciada após as eleccións de marzo de 1979, o texto ficou a medio camiño entre a proposta da Asemblea de Parlamentarios da Galiza e a alternativa da Comisión Constitucional do Congreso dos Deputados. A norma, afastada do marco competencial do proxecto da Comisión dos 16 e das aspiracións das forzas nacionalistas, continúa a ser hoxe un elemento para o debate entre as formacións políticas galegas.