Seis dos 14 deputados do PSdeG no Parlamento da Galiza, entre eles o ex secretario xeral Gonzalo Caballero, remitiron unha carta a Ferraz na que manifestan o seu apoio ao parlamentario Martín Seco, expedientado pola dirección galega, que pide unha suspensión cautelar de militancia que carrexaría a súa saída do grupo no Pazo do Hórreo.
A misiva foi enviada a pasada segunda feira á dirección federal do Partido Socialista e está asinada, ademais de por Caballero, por Marina Ortega, Pablo Arangüena, Noelia Otero, Noa Díaz e Eduardo Ojea, todos eles deputados do Grupo Parlamentario socialista na Cámara autonómica e afíns ao ex secretario xeral, ao que tamén é próximo o propio Martín Seco. Os parlamentarios, aos que se suma o ex deputado Juan Carlos Francisco Rivera, que renunciou á súa acta en abril, consideran inxustificado o expediente disciplinario aberto a Martín Seco, a quen atribúen unha actitude "impecábel, honorábel, de esquerdas, ao servizo da Galiza e leal ao PSdeG".
Así, manifestan que subscriben a intervención de Seco que motivou a apertura do proceso disciplinario. Nela, criticou o contido da Lei de áreas empresariais da Xunta antes de avanzar que o grupo votaría a favor da norma por indicación da dirección que encabeza o secretario xeral do partido, Valentín González Formoso.
Para este grupo de deputados, na súa intervención Martín Seco "non actúa con irresponsabilidade nin deslealdade" cara ao partido, nin obra "contra as decisións" dos seus órganos do partido. Tampouco consideran que se produza un "menoscabo" da "imaxe" de González Formoso nin que se "poña en dúbida" a directriz de apoiar o texto lexislativo.
Por todo iso, consideran que a apertura do expediente disciplinario é "inxusto" e "inxustificado" pois, din, os feitos elevados ante os órganos do partido a nivel federal "non se corresponden coa realidade", de modo que reclaman que non se impoña a sanción de suspensión cautelar de militancia para Seco como así solicita a secretaría de Organización da formación na Galiza.
En relación a estes feitos, Nós Diario fíxose eco esta terza feira dun informe interno elaborado pola Executiva do PSdeG meses atrás no que se cuestionaban os mesmos puntos da devandita lei que os expostos por Seco na tribuna da Cámara galega.
Expediente
Os feitos que aduce o PSdeG no expediente remitido a Ferraz teñen a súa orixe no pasado mes de setembro, cando Martín Seco foi o encargado de defender a postura do grupo socialista durante o debate da Lei de áreas empresariais elaborada pola Xunta. O deputado, que criticou na súa intervención o contido da norma, avanzou ao rematar que o seu grupo votaría a favor da lei porque así o ordenou "a dirección política do partido".
Esta frase foi entendida pola dirección do partido como un "claro xesto de desafío" a González Formoso, polo que, agora, piden que se lle á parte do grupo e suspéndaselle de militancia, o que carrexaría tamén que abandone as súas responabilidades á fronte do PSOE de Arteixo. Fontes próximas á cúpula dos socialistas galegos defenden que a directriz de votar a favor da lei da Xunta foi adoptada após a rolda de contactos de Formoso con "distintos axentes económicos sociais" que manifestaron o seu desexo de que a normativa saíse adiante ante a preocupación de que a falta de solo industrial no país provocase a "fuga" de investimentos cara a Portugal.
Esta postura, que segundo estas mesmas fontes foi mesmo abordada nun encontro entre o líder socialista e o vicepresidente primeiro, Francisco Conde, foi trasladada ao grupo, polo que Seco recibiu indicacións de defender desde a tribuna a lei. A dirección galega recalca que a súa vontade é actuar con "total contundencia" e "non pasar unha máis" ante unha persoa á que ven "máis fóra que dentro" da organización pola súa actitude, que atribúe a que o grupo de afíns a Caballero "non aceptou os resultados" das primarias de 2021. "Non se vai a consentir que ninguén fomente a división interna nin que se menoscabe a imaxe do partido nos medios ou nas redes sociais", remarcan.
Pola súa parte, Martín Seco defendeu xa a pasada sexta feira que o seu comportamento como membro do partido e dentro do grupo parlamentario foi "impecábel" xa que, lembra, naquela ocasión el mesmo e todo o grupo votaron "o que indicou a dirección do PSdeG", polo que non ve que o seu proceder causase un "menoscabo á imaxe do partido", xa que actuou "con lealdade e en liña co mandato" da cúpula da organización.
