O BNG de Marín denuncia un ataque contra a súa sede tras descubrir que foran arrincados da fachada a placa co logo do partido e os carteis colgados do balcón.
A portavoz municipal do BNG en Marín, Lucía Santos Omil, asegurou que o ataque non foi "un acto improvisado".
“Trátase dun intento de limitar a súa acción política e de tentar infundir o medo entre a militancia", engadiu.
O Bloque Nacionalista Galego xa fixo a denuncia correspondente, e lembrou, nun comunicado, que "non é o primeiro ataque que sofre a sede do BNG en Marín".
A formación asegurou, ademais, que nos últimos tempos “tanto este espazo como os domicilios dalgúns membros do partido sufriron este tipo de incidentes”.
A hipótese da “dereita máis rancia e españolista”
Aínda que se descoñece ao autor ou autores do suceso, o BNG afirmou que os indicios apuntan a "un ataque procedente dos elementos da dereita máis rancia e españolista".
A portavoz municipal comentou que o que conseguen este tipo de accións é " reafirmalos nos seus principios".
Por outra banda, insistiu en que "ao contrario de quen pretende calarnos, de forma covarde”, eles e elas continuarán “traballando día a día e sempre dando a cara, de fronte e coa cabeza ben alta".