Redución da débeda, bonificacións nas peaxes, financiamento ou mobilidade: as chaves do pacto BNG-PSOE

A ministra de Facenda, María Jesús Montero, e a portavoz nacional do BNG, Ana Pontón, asinaron esta segunda feira o acordo de investidura entre socialistas e nacionalistas. O pacto subscrito, cuxo contido foi adiantado na edición do pasado sábado por Nós Diario, recolle en 24 puntos diversas actuacións no ámbito da plurinacionalidade, do financiamento, da mobilidade, da lingua, da memoria histórica e dos dereitos sociais e civís. O acordo entre PSOE e BNG chegou tras máis dun mes de negociacións e tres reunións presenciais. Segundo sinalaron a este xornal diversas fontes coñecedoras das negociacións, o peso das mesmas levárono unha comisión do BNG formada por Néstor Rego, Carme da Silva e Rubén Cela e os responsábeis do Ministerio de Facenda. Nesta liña, destacaron que se trata dun documento moi traballado e concretado, resultado da disposición do BNG a articular unha alternativa ao PP onde Galiza tivese peso e do interese do PSOE en contar cos nacionalistas galegos. Orzamentos do Estado A primeira proba para este pacto chegará dentro de seis semanas, cando dean comezo as conversas para a elaboración do vindeiro orzamento do Estado. Malia tratarse dun acordo de investidura que só compromete o BNG a apoiar a candidatura de Pedro Sánchez á Presidencia do Executivo estatal, nacionalistas e socialistas coinciden en que as contas públicas recollerán dotacións para pór en marcha diversas medidas presentes no documento asinado. Unha das primeiras propostas en entrar en vigor serán as novas bonificacións para as persoas usuarias das autoestradas AP-9 e AP-53. As rebaixas representarán unha redución das peaxes de até 75% para particulares e de até 50% para transportistas. Ao tempo, prevese que ao comezo de 2024 se poñan en marcha tres dos cinco xulgados específicos de violencia de xénero aprobados para Galiza e se dean por rematados os estudos informativos do bypass ferroviario de Betanzos e da liña do camiño de ferro entre Ferrol e A Coruña. BNG e PSOE selan o seu pacto para investir Sánchez: estas son as medidas que beneficiarán Galiza O acordo entre PSOE e BNG fixa unha condonación da débeda pública galega de, aproximadamente, 2.466 millóns de euros, cantidade que representa o 20% da contía total que a xestión do PP á fronte do Goberno galego elevou a 12.333 millóns de euros en xuño de 2023, último mes con datos. Neste sentido, o volume da débeda contraída pola Xunta da Galiza co Fondo de Liquidez Autonómica (FLA) é inferior ao doutras comunidades, como consecuencia da obstrución dos Gobernos do PP a esta liña extraordinaria de financiamento na etapa de José Luís Rodríguez Zapatero. A correlación de forzas no Congreso dos Deputados, os tempos políticos no Estado e a conxuntura política xogan a favor deste acordo. Nesta liña, a maioría tan axustada dos socialistas obrigará o partido do Executivo a contar máis cos nacionalistas que na lexislatura pasada para sacar adiante as súas propostas. Así, no BNG consideran que o seu voto vai ser "practicamente decisivo" en todas as votacións que se dean na Cámara Baixa. As eleccións galegas O pacto asinado entre Montero e Pontón ten importantes derivadas de cara aos vindeiros comicios galegos. Nesta perspectiva, nacionalistas e socialistas visualizan a súa capacidade para entenderse á hora de conformar Gobernos alternativos ao PP e o pacto presenta a ambas formacións con vontade de colaborar en beneficio da Galiza. A este respecto, desde o BNG observan unha posición diferente no equipo de Pedro Sánchez á de hai catro anos. Os principais actores políticos galegos valoraron esta segunda feira o acordo alcanzado entre socialistas e nacionalistas. Nesta dirección, unha das protagonistas da xornada, a voceira nacional do BNG, Ana Pontón, sinalou que “é un acordo que mellora a vida dos galegos e das galegas” e “garante a igualdade de trato para Galiza ante calquera recorte de débeda que reciban outras comunidades autónomas”. Rueda mostra a súa incapacidade como xestor ante os logros do acordo do BNG co PSOE A responsábel nacionalista presentou o pacto como unha expresión da "política útil do BNG, que mellora a vida das persoas" e da "política útil a favor da Galiza, fronte á política inútil do PP para defender os intereses dos galegos e das galegas ante o Estado".Neste sentido, Pontón insistiu en que “Galiza deféndese sen ataduras centralistas, coa política útil do BNG, que se traduce en acordos concretos que mellorar a vida das persoas”. O candidato socialista á Presidencia da Xunta da Galiza, José Ramón Gómez Besteiro, cualificou o texto asinado de “gran noticia” e comprometeuse a “traballar duro para dar á miña terra moitas máis noticias porque teño claro que hoxe se abre un tempo novo na Galiza e é imparábel”. Nesta perspectiva, aseverou que “os investimentos que asinamos hoxe en Madrid son os primeiros dos moitos que no Partido Socialista estamos a conseguir para Galiza”. O mandatario galego, Alfonso Rueda, cuestionou o pacto asinado entre Pontón e Montero. Nesta dirección, afirmou que “na Galiza tomámonos con prevención e con bastante ironía o pacto" e dixo descoñecer a contía de débeda que se lle condonará a Galiza como resultado deste pacto. A este respecto, botou man da liña argumental empregada polos populares nos últimos días para cargar contra os acordos de investidura asinados polos socialistas. O PP mobilizarase o domingo na Galiza contra a investidura de Sánchez A Xunta Directiva estatal do Partido Popular acordou na mañá desta segunda feira convocar mobilizacións en todas as capitais de provincia do Estado para o vindeiro domingo contra os diversos acordos de investidura asinados polo PSOE e diversas formacións políticas. O encontro, onde participaron o presidente da Xunta da Galiza, Alfonso Rueda, e a secretaria xeral dos populares galegos, Paula Prado, serviu para definir a táctica da formación no contexto da conformación dun novo Goberno no Estado presidido por Pedro Sánchez. O máximo responsábel do PP, Alberto Núñez Feixoo, sinalou durante a xuntanza que “somos neste momento o refuxio constitucionalista de España ante aqueles que renunciaron á dignidade e pretenden arrebatárnola a todos", en relación, principalmente, ao PSOE. Nesta liña, Feixoo asegurou que “demostraremos que, haxa Goberno ou non, seguirá unha España unida e seguirá unha España unida ante todos os atropelos de Sánchez. Poderá tentar mercadear con todas as institucións e con todo o diñeiro dos españois, pero nunca poderá comprar a liberdade e a dignidade nin poderá comprar a sociedade española". O presidente galego, Alfonso Rueda, e o líder popular, Alberto Núñez Feixoo, instaron a cidadanía a mobilizarse contra a investidura de Pedro Sánchez. Así, Rueda asegurou comprender o “malestar da xente” en relación coas protestas vividas os pasados días en Madrid diante da sede do PSOE. Ao tempo, Feixoo indicou que "non nos van silenciar"; "imos seguir"; non nos van calar"; non nos van parar".