O último Barómetro de opinión do Centro de Investigacións Sociolóxicas (CIS), correspondente ao mes de marzo, o primeiro tras a primeira votación da Lei de Amnistía no Congreso, o estalido do 'caso Koldo' e as eleccións galegas, eleva de novo o PP á primeira posición con case tres puntos de vantaxe sobre PSOE, rompendo o empate técnico do mes anterior, con até 34% dos sufraxios.
Os socialistas ficarían, segundo a estimación de voto do CIS, a 2,7 puntos da formación que lidera Alberto Núñez Feixoo, cun total de 31,3%. Os 'populares' sacan ademais cinco puntos aos socialistas en voto xa decidido, cun 25,2% polo 20,8%. Pola súa parte, Vox escala ata a terceira praza e anota unha estimación de voto de 9,9%, por diante do 9,2% de Sumar, que cae da terceira praza.
Aliás, con base na mesma enquisa, o BNG experimenta unha importante repunta en comparanza co barómetro de febreiro, pois pasaría do 0,7% de sufraxios totais —sobre o conxunto do Estado español— a un 0,9%, dúas décimas máis, a mesma porcentaxe que o CIS dá ao PNV, e até tres décimas por riba do resultado dos comicios estatais de 2023.
Tomando como referencia o anterior barómetro, Podemos cede sete décimas e fica cun 2,2% dos apoios, só tres décimas por riba da sexta formación en estimación de voto, ERC (1,9%). Inmediatamente despois situaríase Junts, con 1,2% dos apoios, 0,1 puntos máis que EH Bildu, que no último mes sobe tres décimas nos estudos do CIS.
Após as formacións nacionalistas preséntase, como undécima en sufraxios, o Pacma (0,7%), unha décima máis que en febreiro, mentres Coalición Canaria medra na mesma proporción, até o 0,2%, e fecha a listaxe UPN, co mesmo 0,1% que no mes anterior. Habería tamén 2,1% de votos en branco e até 4,3% de papeletas para outros partidos políticos.
