O alcalde da Illa de Arousa, o socialista Carlos Iglesias, sufriu unha agresión na madrugada deste domingo que lle provocou "lesións graves", segundo informaron desde a súa formación a través dun comunicado. Os feitos foron postos xa en coñecemento da Garda Civil para ser denunciados.
A agrupación local do PSdeG cualificou de "brutal agresión" este acontecemento —que lle ocasionou unha rotura de clavícula— e expresou a súa enérxica condena á violencia en calquera das súas manifestacións.
Aliás, lamentou o comportamento "incívico" de quen recorre á forza física para facer valer os argumentos que non "é capaz de defender desde a racionalidade e a capacidade de oratoria".
De forma paralela, os socialistas da Illa trasladaron ao alcalde e a súa contorna familiar todo o seu apoio e lamentaron que se produzan este tipo de condutas, á vez que insistiron en que a violencia "nunca é o camiño".
Segundo apuntaron diferentes medios nas últimas horas, os feitos ocorreron durante as festas patronais do municipio, cando un veciño se dirixiu a Iglesias recriminándolle algún asunto de forma violenta.
"Estabamos a falar e el púxose moi nervioso. Como non lle estaba dando a razón, zarandeoume e tiroume ao chan", apuntou o alcalde na tarde deste domingo, após transcender os feitos.
Denuncian un intento de atentado en Vilanova
Os socialistas da Illa estenderon a súa condena aos feitos que transcenderon en Vilanova de Arousa, onde unha patrulla da Garda Civil deu o sábado cun artefacto incendiario baixo o coche do rexedor desta vila, Gonzalo Durán, do PP.