Un total de 2.693.624 galegos e galegas poden votar desde as 9 horas de hoxe nas eleccións nacionais que se levarán a cabo este domingo, 18 de febreiro, segundo os datos que publicou en decembro o Instituto Nacional de Estatística (INE).
Delas, 2.217.110 residen na Galiza e 476.514, 17’7% do censo, no estranxeiro. E en canto ao 'Top-5' de países, segundo o número de potenciais electoras, a Arxentina segue á cabeza con moita diferenza, xa que computa 166.289. Séguenlle Cuba e Brasil, onde se superan os 45.000. Mentres, Uruguai computa 37.165; e Suíza, o primeiro país alleo ao continente americano no ranking, 34.114.
Ademais, 79.072 persoas poderán participar por primeira vez nunhas eleccións ao Parlamento da Galiza, por cumprir 18 anos desde a anterior votación, celebrada o 12 de xullo de 2020.
Por circunscricións, na Coruña serán 1.088.386 as galegas con dereito a voto, sendo a máis ampla, seguida de Pontevedra, con 911.704 sufraxistas. En Lugo poderán emitir o seu voto 337.734 persoas, e en Ourense, 355.800.
A xornada desenvolverase en 2.347 locais electorais que, en total, albergarán 3.950 mesas.
Voto por correo
De todas as potenciais votantes, case 59.000 emitiron xa o seu voto por correo, o que supón 37% máis que nos comicios de 2016 e unha caída de 20% en comparación cos datos de 2020, unhas eleccións con marca histórica de sufraxios a distancia nuns comicios marcados pola pandemia da Covid-19.
