Abel Caballero anuncia 1.000 árbores con luces de Nadal e o BNG recórdalle que é ilegal

O alcalde de Vigo anunciou esta semana que alumará un millar de árbores. Desde o BNG lémbranlle que pendurar luces de Nadal nas árbores está prohibido por ordenanza municipal.

Abel Caballero, este agosto, na inauguración do inicio da instalación das luces de Nadal.
photo_camera Abel Caballero, este agosto, na inauguración do inicio da instalación das luces de Nadal.

A instalación das luces de Nadal iniciou esta semana en Vigo -en plena pandemia e no mes de agosto- cun acto do alcalde, Abel Caballero, en que anunciou 11 millóns de luces e un millar de árbores alumeadas, 550 máis que na última ocasión. “As luces son frías, non danas as árbores”, dixo o rexedor.

Desde o BNG, o concelleiro Xabier Pérez Igrexas lembrou ao alcalde que o artigo 16.6 da ordenanza municipal estabelece literalmente a prohibición de “arrincar ou partir árbores, pelar ou arrincar as súas cortizas, cravar puntas, atar a elas randeiras, escaleiras, ferramentas, soportes de andamiaxe, ciclomotores, bicicletas, carteis ou calquera outro elemento, gabear ou subir ás mesmas”.

Así, o nacionalista anunciou esta quinta feira, 5 de agosto, que o interpelará o Goberno local na próxima comisión informativa de Medio Ambiente do Concello para instalo a respectar a normativa municipal. 

“As árbores non son postes e resulta moi difícil de entender que o alcalde non comprenda que o que acaba de anunciar é aberta e totalmente ilegal, e se permita o luxo de facer gala de que vai incumprir deliberadamente unha ordenanza municipal en vigor”, reprochou o edil.

Dendrofobia

O portavoz municipal nacionalista cargou contra a política “arboricida” do Executivo local. “Que problema ten Caballero coas árbores? A súa obsesión, polo ‘arboricidio’ permanente raia xa no patolóxico, parece que padecese dendrofobia (fobia ás árbores)”, afirmou o edil, lembrando as reiteradas tallas “arbitrarias e inxustificadas” como a recentemente practicada na Praza da Princesa contra varios exemplares sans de liquidámbar.

Comentarios