Este sábado 18 terá lugar no Centro Multiusos de Domaio, Moaña, unha xornada sobre os usos da illa de San Simón. A illa é un dos lugares de memoria máis importantes da Galiza mais segue sen un plan que regule os seus usos, malia ser unha esixencia legal para os que ostentan a condición de Ben de Interese Cultural. Esa foi unha das razóns que provocou a organización de actividades pouco acaídas para un espazo que foi cárcere franquista.
Precisamente, da importancia de respectar a memoria dos lugares de terror da ditadura falará o sábado a investigadora Iria Morgade, que estudou a historia de espazos como Camposancos ou o Mosteiro de Oia.
Logo tomará a palabra o profesor de dereito de Universidade da Coruña, Carlos Amoedo, especialista en dereito patrimonial que, na súa ponencia "O marco legal da illa de San Simón", aclarará cal é normativa que limita os usos do Lazareto.
Mesa redonda
Na mesa redonda posterior -á que se negaron a asistir as navieiras que operan na illa-, estará Julio Gómez, organizador do festival SinSal, e a alcaldesa de Redondela, Digna Rivas, como representante da administración que acolle a illa. Por parte do movemento memorialista falarán Matías da Torre, voceiro da IGM, e a integrante do colectivo e investigadora Montse Fajardo.
A alcaldesa de Moaña, Leticia Santos -cuxo goberno apoiou á IGM na celebración das xornadas logo de que a Xunta se negase a facilitar a infraestrutura para poder facelas na propia illa– inaugurará a xornada ás 10.30 horas e ás 14 horas está previsto o feche a cargo do poeta Xosé María Álvarez Cáccamo, activista en pro da memoria histórica e neto de Darío Álvarez Limeses, asasinado polo fascismo en outubro de 1936.
