O BNG reivindica en Pontevedra un recoñecemento “sen ambigüidades” da figura de Alexandre Bóveda

A praza de Curros Enríquez de Pontevedra acolleu esta quinta feira, 17 de agosto, o acto co que o BNG rende homenaxe á Galiza Mártir, data central do calendario da memoria histórica galega e na honra do fusilado Alexandre Bóveda.

Na voz do alcalde de Soutomaior e integrante da Executiva Nacional do BNG Manuel Lourenzo, a formación nacionalista defendeu o legado do galeguista e subliñou que hai que reivindicar a súa figura “sen ambigüidades”, criticando o PP por revisar a historia con equidistancia e discursos asimilábeis á ultradereita, desnaturalizando o sentido da celebración, da obra do político e os motivos do seu asasinato.

Lourenzo, partindo da carta de despedida escrita por Bóveda nas horas previas á súa morte, salientou que o de Poio é unha figura de referencia actual que require un recoñecemento sen ambigüidades da súa loita política e a de todos os homes e mulleres que coma el sufriron a persecución e o asasinato polo fascismo franquista español.

O rexedor da vila veciña de Soutomaior criticou o Partido Popular e a súa participación no acto decorrido na mesma xornada na Caeira e organizado pola Fundación Alexandre Bóveda e o Concello de Poio. Lourenzo cualificouno como “branquear e revisar a historia con posturas asimilábeis ao que está a facer a ultradereita, que non é algo de recibo”.

Lembrou Lourenzo que o PP na Galiza nega as políticas de memoria histórica e pretende derrogar a Lei de Memoria democrática no Estado mentres noutras autonomías a coalición con Vox pretende fulminar calquera actividade de recoñecemento das vítimas, polo que cualificou de “dobre cara” que o conselleiro Román Rodríguez asistira esta quinta feira á celebración por vez primeira.

 “Se a figura de Bóveda chegou a nós foi porque a verdade triunfou sobre a mentira. Non podemos permitir que a vida de Bóveda sexa dobremente asasinada: fisicamente no seu momento e agora enterrada nunha historia revisada e parte da mentira”, insistiu o nacionalista.

Neste sentido, instou o PP a “posicionarse claramente en favor das vítimas” e apoiar a iniciativa que o BNG presentou no Parlamento galego para institucionalizar o 17 de agosto como Día da Galiza Mártir para “honrar a todas as persoas perseguidas e asasinadas ou vítimas do cárcere, vexacións ou o exilio, crear uns galardóns de recoñecemento a entidades de memoria histórica e anular todas as sentenzas, expedientes e sancións ditadas durante a Ditadura”.

Os principios de Bóveda “seguen vixentes”

Pola súa parte a alcaldesa de Pontecesures, Maite Tocino, falou destacando que teñen pasado oitenta e sete anos despois do asasinato de Bóveda, “mais os principios, a coherencia e a loita por procurar unha sociedade xusta, igualitaria e avanzada, seguen vixentes na actualidade”, lembrando o seu compromiso coa Galiza como redactor do Estatuto, como impulsor e alma mater do Partido Galeguista e tamén co avance económico e social do país.

A representante de Galiza Nova, Irea Ferreiro, pola súa banda, fixo na súa intervención un repaso do que significou a morte de Bóveda e o seu contexto para a mocidade “como a faísca que iniciou que a xente moza tomase consciencia e mantivera viva a loita pola que o mataron”. “Esa loita chegou até hoxe en día para que a súa memoria se siga a recordar por parte de Galiza Nova e a mocidade nacionalista siga na liña do que loitou a súa xeración”, insistiu.