gaitear.- (Ademais de significados xa rexistrados) Ouvear o raposo.
Exemplo.- "Cando gaitea nom é sinal de boa cousa."
Lugar de escoita.- Vicinte (Outeiro de Rei).
Fonte.- Ramiro Barros Justo.
groucho.- (Ademais doutros significados rexistrados) Trago, grolo dun animal, sobre todo referido ao gando vacún.
Lugar de escoita.- Maside.
Fonte.- Cesáreo Sánchez Iglesias.
leixó.- Trampa artesanal para cazar ratos.
Lugar de escoita.- O Courel.
Fonte.- Dun vocabulario courelao.
lontrudo.- Dise do animal que está ben mantido e ten bo pelo.
Exemplo.- "O can non che pasa fame, que se ve moi lontrudo."
Lugar de escoita.- Burela (Mariña luguesa).
Fonte.- Mario Ferreira.
pes (ou pez).- Pegamento artesanal feito con fariña triga que botado en palliñas servía para cazar paxaros.
Lugar de escoita.- Sur de Galiza.
Fonte.- C. D. Atalaia de Vigo.
Outros apuntamentos.- Foi recibida así, pero talvez sexa pez, se no lugar de escoita se usa o seseo.
restillar.- (Ademais de significados xa rexistrados) Manter, ter o gando cheo.
Exemplo.- "Veu do prado coas vacas restilladas."
Lugar de escoita.- A aldea de Son (Navia de Suarna).
Fonte.- ENDL de Navia de Suarna (Raquel).
tomar a cebada.- Acción do cabalo ao dar a volta.
Lugar de escoita.- Viveiro.
Fonte.- Natalia Rey Pico.
Outros apuntamentos.- Centro de Día de Abadín.